PMJVK kaltlanga CSC sak thar Lunglawn-ah hawn a ni

Sawrkar laipui Ministry of Minority Affairs hnuaia Pradhan Mantri Jan Vikas Karyakram (PMJVK) Scheme 2020-2021 kaltlanga cheng nuai 127.38 senga sak, Lunglei Lunglawn-a Community Service Centre (CSC) chu nimin khan Lunglei South bialtu MLA Lalramliana (Papuia) chuan a hawng a, a bial chhung Lunglawn-a CSC tha tak sak zawh leh hawn theih a ni ta chu lawmawm a tih thu sawiin, bul tantu sawrkar hmasa chungah leh Sports Minister leh bialtu MLA hmasate chungah lawmthu a sawi bawk.

CSC Lunglawn, Lunglei District sakna atan hian India sawrkar Ministry of Minority Affairs hnuaia Pradhan Mantri Jan Vikas Karya-kram (PMJVK) Scheme 2020-2021 kaltlangin cheng nuai 140 dawn a ni a; Central Share hi 90% (cheng nuai 126) niin State Share 10% (cheng nuai 14) a ni a. Hna thawk tur hian tender chhuah a nih hnuah M/s Excell Consultancy Services, Mission Veng Aizawl te thlan niin, Work Order amount hi cheng nuai 127.38 a ni a. July ni 22, 2022 khan hna thawh tan niin, September ni 12, 2024 khan zawhfel a ni.

He building hi chhawng hnih a sak niin, a hnuai zawk hi a dung metre 16 leh a vang metre 3-a zau a ni a. Pindan (room) pali (4) ruahman niin, Toilet dah tel a ni bawk. Ground floor hi a dung metre 16 leh a vang metre 9 niin, Multipurpose Hall atana ruahman a ni a. Puipunna hmun atan bakah Sports discipline hrang hrangte pawh he hmunah hian khelh theih a ni ang. A chhungah hian MSSC chuan plastic Chair 80, Dawhkan 3 leh Steel Almirah pakhat an dah nghal a ni.