Mizoram Assembly Budget Session tan a ni dawn

Mizoram Legislative Assembly Budget Session chu Vawiin hian neih tan a ni dawn a, thla thar March 20 thleng a awh ang.

Vawiin-a tan tur Mizoram Legislative Assembly thutkhawm ah hian Assembly inkhawm tan ni, February ni 19 hian Larsap General Vijay Kumar Singh chuan kum khata Assembly Inkhawm hmasa ber a nih avangin dan pangngai angin Assembly chhungah thu a sawi anga, Larsap thusawi chungchanga lawmthu sawina Motion chu putluh leh tur a ni ang. Naktuk-ah Session hi chawlin February ni 21-ah Prime Minister hlui Dr. Manmohan Singh sunna hun hmangin Larsap thusawi chungchanga lawmthu sawina Motion sawiho a ni bawk anga, March ni 4 khian Finance changtu Chief Minister Lalduhoma chuansawrkar kumthar (2025-2026) atana Mizoram sum hman tur ruahman (annual budget) chu a pharh ang a. Hei hi budget a vawi 2 pharhna tur a ni anga, hemi hnu hian Budget sawihona neih chhunzawm chhoh a ni tawh dawn a ni.

Tun tuma Mizoram Legislative Assembly Inkhawm atan sawrkar Dan siam tura duan thar pathum a lut tawh a, heng zingah hian Higher & Technical Education Department atanga thehlut Mizoram State University Bill a tel a, hei bakah hian sawrkar Dan siam tura duan thar LESDE atangin The Mizoram Private Placement Agencies (Regulation) Bill, 2025 leh UD&PA atangin The Mizoram Urban & Regional Development Bill, 2025 te thehluh a ni tawh a, He'ng bill pathum bakah hian Finance Department atangin Dan siamthat tur, The Mizoram Goods & Service Tax (First Amendment) Bill, 2025 chu thehluh a ni tawh bawk.

Heng bakah hian Official Resolution pakhat lut tawhin, hei hi Environment, Forests & Climate Change Minister Lalthansanga'n Assembly pawmpui tura a putluh tur a nih thu dawn a ni a. Hei hi Parliament-in dan a lo pawm tawh, ‘The Water (Prevention & Control of Pollution) Act’ Mizoram Assembly in a lo pawmpui (ratify) vena tur nia thu dawn a ni a. Mimal thehluh (Private Resolution) 85 a lut tawh a. Zirtawpni hi Private Member-te puala hun hman thin a nih laiin tun Assembly Session-ah hian Zirtawpni vawi khat February ni 21 bak chu Zirtawpni apiang chawlh a nih dawn avangin hun a awm dawn lova. February ni 21-ah pawh hian Prime Minister hlui Dr. Manmohan Singh sunna hun bakah Larsap thusawi chungchanga lawmthu sawina Motion sawiho ni tur a nih dawn avangin hun a tlem hle dawn a ni.

Tun tum Session atan hian Zawhna pawh House chhunga chhan chi (Starred question) 817 leh ziaka chhan chi (Unstarred question) 96 a lut tawh a. House dawhkana dah tur lehkha pawimawh 5 a lut tawh bawk a ni.