Registrar of Marriage te tan Annual Training neih a ni

Serchhip District chhunga Registrar of Marriage te tan an hnathawh dan chungchang inzirtir tharna kumtin-a neih thin chu kumin atan nimin khan Serchhip Press Club-ah neih a ni.
Mizoram sawrkar Law and Judicial Department hnuaia Registrar General of Marriage buatsaih he zirhona neihpui tur hian Law and Judicial Department atangin Head Assistant, Malsawm leh a thawhpui te chu Aizawl atangin an rawn kal a, he huna kalkhawm Serchhip District-a Registrar of Marriage te chu an hna te theihtawp chhuaha a tha thei ang bera thawh tum tura chahin, harsatna an neih te an hnena zawt thin tur leh an hnathawh chu kawng hrang hrangah a pawimawh zel avangin fimkhur leh dik taka thawh tum turin an chah a. Hei bakah hian Report thehluh ngai pawimawh tura chahin, thla tin an thei lo a nih pawhin thla thum dan-ah tal thehlut tur leh Report tur an awm loh pawhin ‘Nil Report’ tal thehlut turin an chah a. Registrar of Marriage te chuan Un-Marriage Certificate an pe thei lo tih pawh an sawi bawk.

Supreme Court thuchhuak ang leh chhan hrang hrang avangin Mizoram chhunga inneih te chhinchhiah ngei ngei tur a nih avangin Mizoram Legislative Assembly chuan Mizoram chhunga inneih te chhinchhiah ngei ngeina tur Dan, The Mizoram Compulsory Registration of Marriage Act and Rules, 2007 a siam a, he Dan hi Mizoram pumah April 1, 2008 atanga hman niin Serchhip District-ah hian Registrar mi 44 an awm mek a. He Dan hnuaiah hian Hnam, Chi leh Sakhaw hrang hrang ten anmahni tihdan leh chindan pangngai anga nupui/pasal inneih bakah nupui/pasal inneih lehna te pawh a huam a. Hemi hnuaia Certificate an pekchhuah te chu sawrkar Document hrang hrangah hman a ngai tawh bawk a ni.