Ramri buai chungchangah State pahnih Official ten March thla tawp-ah inbiakna neih an tum

Ramri buai chungchangah Mizoram leh Assam sawrkar Official-te chuan March thla tawp lama inbe turin ruahmanna an siam.

Home Secretary Vanlalmawia sawi danin Official-te inbiakna atana rawtna an siam vawi thum lai Assam sawrkar hnena an thlen chu Thawhtanni khan Assam Home Department chuan a rawn chhang ta a. Assam sawrkar hian March thla tawp lamah State pahnih Official-te inbiak nise tiin rawtna an rawn siam a. Hei hi Mizoram sawrkarin a ngaihtuah ve-in thutlukna a siam dawn a ni. Nikum August ni 9-a Aizawl-a Home Minister K. Sapdanga ho Mizoram aiawhte leh Assam Border Protection & Development Minister Atul Bora kaihhruai Assam sawrkar aiawhte inbiak tuma March ni 31, 2025 hma ngeiin Guwahati-ah Minister pahnihte'n inbiakna chhunzawm se ti a thu an dah chu tihpuitlin theih a ni dawn ta lo ni-in a lang a ni.

Mizoram sawrkar hian Minister Level-a inbiak hma hian an inbiakna tur atana kawng lo sial lawk a, ram inchuh chungchang hi State pahnih Official-te'n chipchiar taka lo sawiho phawt nise tih an rawt reng a. Assam sawrkar lamin chhanna an rawn pek mai loh avangin inbiak hun a khawtlai ta niin Home Department hotute chuan an sawi a ni.