Sawhthing man bat a ni dawn lo tih sawi

Chief Minister Lalduhoma chuan sawrkarin Sawhthing a lei tan ah Sawhthing man tur District tinah dah sa vek niin sawrkarin Sawhthing man a ba dawn lo tih a sawi.

Nimin-a Assembly Session-a Larsap thusawi a lawmthu sawina Motion sawihona ah Chief Minister chuan, niminpiah atanga sawrkarin kuthnathawktute Sawhthing a lei tanna ah Support Price pek sa vek a ni tih sawiin, sawrkar chuan a ba in a lei dawn lo tih a sawi a. Chief Minister chuan Sawhthing lei a sawrkar senso chu a hloh zawngin a kal nia sawiin, Support Price Rs. 50-ah Rs. 40 vel sawrkarin a hloh tih a sawi a, hei vang hian sawrkar phurrit lo zawnga a kalpui dan tih danglam a nih pawhin mipuiten sawrkar an hriatthiam a beisei tih a sawi a ni.

Hmunphiah chungchang sawiin Chief Minister chuan, Hmunphiah hring lei turin sawrkar a intiam lo a, a ro lei tura ruahman a ni tih a sawi a, a thartuten a ro a hralh lovin a hringin an lo hralh thin avangin lei tur a tam lo a, sawrkar ruahman anga Grading siam pawh kalpui theih a ni lo tih a sawi a. Sawrkar chuan Grading siam lo a kalpui theih dan tur ngaihtuah mai a tha zawka a rin thu tuna Hmunphiah thartuten an hralh bang zawng chu leisak vek an ni dawn tih a sawi a ni.