Tui Bill tihsan tumna an neih loh thu PHE Minister in House a hrilh

PHE Minister Prof. Lalnilawma chuan, sawrkarin Tui bill tihsan tumna a neih loh thu leh Tui bill tihsan chungchang chu mi thenkhat thu vawrhdarh mai mai niin a sawi a. Tui-a Aizawl chawmna atana tui an pump na ber Tlawng lui-ah tui a tlem zel thu House a hrilh bawk.

Nimin-a Assembly Session-ah Tui Bill tihsan tumna a awm leh awm loh chungchang zawhna chhangin PHE Minister chuan, hemi chungchang hi Department Level-ah vawi khat mah an la sawi loh thu a sawi a, hetih rual hian VC inthlan dawn ah mipuiten Tui an hnianghnar theih nana PHE Department in theihtawp a chhuah avangin tam zawkin Tui sem a ni a, Tui sem a tam avangin Tui metre pawh a kal sang a, chu chuan a Bill pawh a tihsan ve mai avangin mi thenkhatin Tui bill tisang zawngin sawrkarin hma a la niin thu an vawrhdarh mai niin a sawi a ni.

PHE Minister chuan tun dinhmunah Aizawl Water Supply Scheme Phase-I atangin nitin tui litre maktaduai 9.68, Phase-II atangin litre maktaduai 16, Phase-II atangin litre maktaduai 8.44 pump theih a ni tih a sawi a. Tlawng lui tui kam zel chungchang sawiin, Data thar ber ang chuan Tlawng lui-a tui awm zat chu February 19, 2024-ah litre maktaduai 110 a nih laiin, kumin February 19 ah chuan litre maktaduai 89.139 a nih thu leh kum hmasa aiin kumin ah litre mtd. 20 velin a tlem zawk tih a sawi a, “Ni khatah tui litre mtd. 34.12 pump thei mah ila, a pump tur a tlem zel chuan a ngaihna a awm dawn lo,” tiin hei hi ngaihtuah ngai tak a nih avangin Tlawng tui khuahna metre 1-a tihsan tumna chu rang zawka tih a ngaih thu Chief Minister hnena a sawi hnuah hmalak tum nghal niin tuna Tlawnga tui awm ang ang engemaw chen chu Temporary Barrage siamin, tui lo khawl lawk tum a ni a, kar kalta atang khan hma an la tan tih House a hrilh a ni.

Aizawl khawpui tuilakna khawlte tuilian in a chim chungchangah Prof. Lalnilawma chuan, “Kum 2017-ah tulianin a chim tawh a, May 28, 2024 ah a chim leh. Chief Minister hnenah hmalak vat a ngaihthu ka thlen a, ani'n min ngaih pawimawh sak a, hmalak chhoh mek zel a ni,” a ti a. Hemi-a hmalakna ah hian Vertical Turbine Pump House, Clear Water Pump House, Duty Room leh Clear Water Sump-te chu tuna a awmna atanga metre 2.7 atanga metre 3 ah chawisan vek tum a nih thu sawiin, “Sum senso ngai zat tur chu cheng vbc. 30 vel a ni a, SASCI atangin cheng vbc. 11.81 hmuh a ni tawh,” a ti a, sum mamawh angte an dil belh mek thu a sawi bawk.