Pathian Lal Ram Sawrkar (PLRS)

 Pathian Lal Ram Sawrkar (PLRS)

- Rev. Dr. Zaichhâwna Hlâwndo
 

Kum 2012 February 26-a Dubai Airport=ah ka pianna rama Missionary hna thawk tura hawng tura min hrilhtu khan thil tum a neih chu Zoram Thar siam a ni. Chu Zoram Thar siam tura a din hmasak tur min hriattir chu a Lal Ram Sawrkâr din a ni. Chu Pathian Lal Ram Sawrkâr ah chuan mihring tumah lal ve a rem dawn lova, chhiahhlawh hna bâk a thawh theih dâwn loh tihte min hriattir bawk. Chu a lal ram tâna chhiahhlawh tura hriak a thihte zawngkhawm turin chiang takin min hriattir bawk. Lalpa kohna ang chuan ka lo hâwng ta a, a Lal Ram Chanchintha chu ka han sawi ta a. A thu chu tha kan lo ti hle a, mahse khawvel party politics sawrkâr bâk chu ding thei emaw piang thei turin kan lo ngai lo. Ram leh hnam hmangaih tak taka in chhâl, nasa taka Pathian thu sawi a, tawngtai thinte pawh chuan Pathian Lal Ram chu he leiah hian ding tur leh ding thei turin kan lo ring meuh lo. 

Kum 10 chuang a taka PLRS din tura politics kan luhchilh a, kan han beih tak tak hnu hian mipuite pawh kan harh chho tan ta! Party politics ah chuan Pathian thu chiah an duh a, amah Pathian chu an duh tak tak lo a ni tih pawh kan hmu. He Party Sawrkâr kal dan leh Pathian Lal Ram Sawrkâr chu ram letling, thil in anglo a ni tih kan sawi pawh kan hrefiah zêl. Mizoram mai nilo, khawvel puma Democratic Government kalphung ah chuan indona leh INREMLOHNA hian tawpin tai a nei lo. Pathian Lal Ram Sawrkâr ah chuan REMNA in tawpin tai a nei lo thung dawn a ni. Party politics kalphung leh Pathian thu chu a indo tlat avangin party politics khel chunga Pathian thu awih tum chu ‘changel a sawibel tum’ ang vel a ni tih chu party politics luhchilhtute hi a hrechiangtu ber an ni ang. Pathian thu chuan hmelmate hmangaih tur a tih lâiin, party politics ah chuan a hma a an hmêlma ni miah lo te pawh hmêlma a siam belhchhah zelna a ni. Bible chuan mahni aiin midang tha zawka ruat tur a tih laiin, mahni party mi nilote chu a chhe thei ang bera chhuah kha kan thupui ber a ni lawi si. 

PLRS din chu Lal Isua thil tum a ni hleinem, “Ka ram chu khawvel a mi ni lo’ a ti a lawm tiin mi tam takin PLRS hi paihthlâk an tum thin. Heta Lal Isua’n a thusawi ah hian khawvel hi a lal ram emaw a ta nilo tih a sawi lova, Pilata te lalna ang kha a lal ram a nih ve loh thu a sawina a ni zâwk. Amah kan Lalpa Isua Krista ngei khan “Lei leh vana thuneihna zawng zawng ka hnenah pek a ni” (Matthaia 28:16) a ti. Van-a a lawn dâwn a ringtute tawngtai thupui ber tur leh an tawngtai dan tur a chah ah khan a ngaih pawimawh chu khawvêla a lal ram din a nih avangin ‘Thy kingdom come = I lal ram lo thleng rawh se’ tih leh ‘Thy will be done one EARTH as it is in heaven = I duhzawng vana an tih angin lei amin ti rawh se,’ tih a ni. Hetah hian chiang takin khawvêl hi a ta a ni a, a lal ram a dinna tur leh a duhzawng kan tihna tur pawh leiah hian a ni tih a chîang hle. Chutih rual chuan a dinna tur atan hian a hmanrua tur chu amah ringtute, a hnung zuitute an ni tih chu van a lawn dâwna a thuchah ah hian a chiang. 

Chu Pathian Lal Ram Sawrkâr chu leiah a ding tawh reng em? tih chhanna chu ‘la ding rih lo’ tih hi a ni. Khawvel hmun hrang hrangah lal ram hrang hrang a lo ding tawh thin. Amaherawchu Lal Isua’n din a tum ang hi khawi ramah mah a la ding lo. Chuti a nih chuan engatinge kan ramah kher din a tumna chhan? tih kha kan zawhna chu a ni ang. A chhanna chu Lalpa zawnchhuah ram leh hnam kan nih vang a ni. Lal Isuan “Israel hnam berambo te hnenah chauh lo chuan tirh ka nilo” (Mat-thaia 15:24) a ti. Zofate hian ‘Pathian hnam thlan’ kan ni tih hi tuma hrilh ni lo hian kan lo hre vek tawh. Kan in chhuanna ve ber pawh Chanchin tha lo chu thildang engmah thawnchhuah tur kan neilo tih hi a ni. Khawvel ram pumah a mihring tam lam (population) a chhûtin missionary tir chhuak tam ber kan ni an ti. Kristian za ah za (100%) a in chhal ngam ngat kha kan lo ni tawh. Pathian in a fa tak roluahtu ni tura a hnam thlan te kan ni.  

Pathian Lal Ram Sawrkâr chu eng atana ding tur nge? tih kha kan zawhna tur chu a nih ka ring. Khawvêl zawng zawng hi ama Lal Ram a nih a, lei tinréngin Isua chu Lal a ni an tih a, khup tin reng a lalna hnuaiah an thingthit na turin. Lei thar a siam dawn chuan mihring thar a siam phawt angâi. Chu mihring tharte chenna chu Eden Thar a lo ni tawh dâwn a ni. Lal Isua Kristan a Lal Ram Sawrkâr a din hnuah chuan chu a Lal Ram Chanchintha chu khawvel pumah hril darh tur a ni ang. Tin, he lal ram Chanchin tha (Gospel of the Kingdom of God) hi hnam zawng zawng hriattirna turin khawvel zawng zawngah hrilhin a awm ang; chu mi zawhah chuan tawpna chu a lo thleng ang (Matthaia 24:14). 

Rome 8:19 ah chuan ‘Thil siam zawng zawngte chuan beisei êm êmin Pathian fate lo lanna chu an nghâkhlel hle si’ tih kan hmu. Thil siam zawng zawng hnena chanchintha hriltu tur, Pathian fate lo lan hun tur chu a lo in herchhuak dâwn tihna a ni. Thlarau chhandamna, khawngaihna chanchintha mai ni tawh lovin Pathian Lal Ram Chanchintha kan hril tawh dawn a nih chu. Marka 16: 15, Tin, an hnênah, ‘Khawvêl zawng zawngah kal ula, thilsiam zawng zawng hnênah chuan Chanchin tha hi hril rawh u’ tih kan hmu. Pathian Lal Ram Sawrkâr (PLRS) a lo din hunah Pathian fate chuan thilsiam hnena chanchintha hril hna kan thawk tak tak tawh dawn a ni ngei ang.