Sawrkar ruahmanna angin Vawiin hian Serchhip District-ah Sawhthing lei tan a ni dawn

Mizoram sawrkar chuan ruahmanna a lo siam tawh angin Vawiin, February 20, 2025 hian Secondary Collection Centre (SCC) hrang hrangah Sawhthing a lei tan dawn ta a, nimin khan Serchhip-ah District Bawrhsap hovin Serchhip District Agriculture Marketing Committee (DAMC) chuan hemi chungchang hi an sawiho bawk.
Serchhip DC Meeting Hall-a Serchhip District Agriculture Marketing Committee (DAMC) thukhawm ah hian District Bawrhsap leh DAMC Chairman Paul L.Khuma chuan sawrkar policy hlawhtlinna turin thawhhona tha a pawimawh thu sawiin, thawktu zawng zawngte tangrual a, inpawhtlang taka harsatna awm thei apiangte inhrilhtawn zel a tul thu a sawi a. Felfai taka Sawhthing lei leh hralh te kalpui a nih theih nan Action Plan mumal tak siam a tul thu sawiin, Serchhip District Bialtu Co-ordinator chu Action Plan siam turin a ruat nghal a ni bawk.

Sawrkar ruahmanna anga Sawhthing te leina tur hian Serchhip District-ah Secondary Collection Centre (SCC) pasarih (7) a awm a. Heng SCC pakhat zel atan hian DAMC chuan Supervisor a ruat a. Heng Supervisor te hian Co-ordinator te nen thawkhoin ruahmanna leh tul ang ang an sawiho thin dawn a. Vawiin-a Sawhthing hralh tan ni-ah hian Supervisor ten an bial theuha SCC te an tlawh dawn a. Serchhip District Bawrhsap Paul L.Khuma, DAMC Chairman leh Lalchharliana, DAMC Member Secretary te chuan Vawiin hian Chhiahtlang-a SCC an tlawh dawn a. Sawhthing leikhawm sa te hi programme tawi buatsaihin an vailiam dawn a ni.

Sawrkarin ruahmanna a siam angin Serchhip District-ah hian thla khat chhungin Sawhthing kg 5,25,000 lei a ni dawn a. Chumi senso tur atan Serchhip District tan Rs. 2,62,50,000 chu ruahman niin Farmer te Bank Account-ah Direct Benifit Transfer hmangin Sawhthing leina pawisa hi thun zel a ni ang.

Tarlan tawh angin Serchhip District-ah hian Secondary Collection Centre (SCC) hi a tirah hmun 4 siam niin kuthnatahwktute tana remchan zawkna turin pathum siam belh lehin a vaiin SCC hi 7 siam a ni a, chung te chu Chhingchhip, Serchhip, Thenzawl, Khawlailung, North Vanlaiphai, East Lungdar leh Lungpho SCC te a ni a. Heng hmunah te hian Sawhthing hi hralh theih a ni dawn a, ruahmanna pawh peihfel thawkhat a ni tawh a ni.