Lenkawl

 

Serchhip District chhung Village Council pahnih a by-election neih tur atana Party hrang hrangte Candidate chu Vawiin hian hriat kim theih beisei a ni.

Serchhip District chhunga National Highway-54 kawngpui siam hna thawh meka Serchhip atanga hmar lam Chhiahtlang, Chhingchhip, Khumtung leh Baktawng Chan In huamchhung te chu nimn khan District Bawrhsap Paul L.Khuma chuan tlawhin hnathawh kal mek leh harsatna awm te a enfiah.

Serchhip District chhung thingtlang khaw hrang hrangte tana Plastic Waste Management Centre neih leh hman tangkai dan tur chungchanga inrawnkhawmna chu nimin khan Serchhip DC Conference Hall-ah neih a ni.

Serchhip District chhunga sawrkar enkawl Middle School, High School leh Higher Secondary School-a zirlai hmeichhia te tana mahni inven dan zirna tur, Girls Self-Defence Training chu nimin khan a hawnna hun hman a ni.

Nimin August 30, 2024 kha Mizo Zaimi Inzawmkhawm (MZI) dinchamphaphak vawi 44-na a ni a, he ni pual hian MZI Hqrs. Serchhip-a Member te chuan hnatlang neiin Serchhip AOC Veng atanga Tuikhuah Veng thlengin kawngpui dung-a bawlhhlawh chharfai hna an thawk a ni. MZI Hqrs. Serchhip-ah hian tun dinhmun ah Member mi 60 chuang an awm mek a ni.

AH&Vety Department chuan nimin khan Serchhip District-ah African Swine fever (ASF) vanga Vawk thi 18 chhinchhiah lehin heng zinga 7 chu Thenzawl khuaa mi a ni a, Serchhip P&E Veng-ah 4 thiin Keitum khua-ah pathum a thi a, New Serchhip South-ah 2 thiin Piler leh Khaw-lailung-ah pakhat ve ve a thi bawk. Nimin vek khan Veng leh khua 9-ah Vawk suat 55 awmin heng zinga 18 chu East Lungdar khuaa mi a ni. Heti hian kumin chhungin Serchhip District-ah ASF vanga Vawk thi 2996 awm tawhin Vawk 6123 suat a ni tawh bawk a ni.

Serchhip-a Horticulture Department chuan Serchhip District-a Huan nghet leh Nul siam nghet te hnenah nimin khan Huan samna khawl, Brush Cutter an semchhuak a, Brush Cutter semna puala inkhawm Serchhip DHO Office Training Hall, Chanmari Vengthar-a neih chu Sr. Horticulture Demonstrator T. Kapvela chuan kaihruaiin Serchhip DHO R. Lalrintluanga chuan he khawl hman dan te a zirtir bakah heng an bungraw dawn te hi tangkai taka hmang turin duhsakna a hlan bawk a ni. Tun tumah hian mi 50 hnenah Brush Cutter hi semchhuah a ni.

Chief Minister Lalduhoma chu nimin khan USA-a zin turin a chhuak a, USA-a a cham chhung hian Maryland-a Mizo Day-ah khuallian niin Washington DC-ah US State Department Official te nen Meeting an nei ang a, Indianapolis-ah hun a hmang bawk ang. Chief Minister hi a nupui leh a tunu bakah Jonathan Lalremruata, OSD to CM ten an tawiawm a ni.

Mizoram-a sumdawnna atana mikhual zan riak a thlenna nei reng reng te chu Tourism Department-a inziak lut vek tura hriattir an ni.

Mizoram Information Service (MIS) Officer-te tana ni 2 chhung awh 'In-House Training for MIS Officers' chu nimin khan chhunzawm a zawhfel a ni a, he Training kharna hun hi I&PR changtu Secretary  Betsy Zothanpari Sailo chuan a hmanpui a ni. Ni hnih chhung awh 'In-House Training for MIS Officers' ah hian District hrang hranga MIS Officer-te bakah Directorate of I&PR hnuaia MIS Officer-te an tel a. Resource Person 9 te'n MIS Officer-te tana hriat tur pawimawh hrang hrangte bakah Office hna kentel tul hrang hrangte Topic 14-ah thenin an zirtir a ni.

Transport Minister Vanlalhlana chuan nimin khan Hlimen-a lirthei endikna leh Certificate pek-chhuahna tura ruahman, Inspection & Certification Centre (I&C Centre) sak mek chu a hmunah a enfiah a, I&C Centre hi Sawrkar laipui Ministry of Road Transport & Highways, Mizoram Sawrkar Transport Department leh Central Institute of Road Transport (CIRT), Pune, Maha-rashtra te'n thawhhona thuthlung ziah anga kalpui a ni a. Cheng vbc. 15.50 senna tur niin, senso za zela 90 hi Sawrkar laipui tum tur a ni a, za zela 10 hi State Sawrkarin a tum thung ang. Tun dinhmunah hian Sawrkar laipui atangin cheng vbc. 5.34 hmuh tawh niin cheng nuai 34 hi direct-in CIRT, Pune-ah MoRTH kaltlanga pek a ni a. State Sawrkar atangin cheng nuai 54.40 hmuh a ni tawh bawk. He Centre hi sak zawh a nih hunah chuan MoRTH duhdan angin Automated Testing Station (ATS) ah puan tur a ni a, Mizoram chhunga lirtheite fitness chu he hmunah hian khawl hmanga en tawh tur a ni ang.

Labour, Employment, Skill Development & Entrepreneurship Department changtu Minister Lalnghinglova Hmar chuan niminpiah tlai khan Ministry of Skill Development and Entrepreneurship (MSDE) changtu Secretary Atul Kumar Tiwar chu New Delhi-a Kaushal Bhawan-ah kawmin Sawrkar laipuiin ITI tihhmasawnna tur Scheme liantham a ruahman chu lawmawm a tih thu leh Mizoram pawh he Scheme mamawh ber zing a mi a nih thu a sawi a, ITI Upgradation Scheme chungchanga Mizoram Sawrkarin rawtna hrang hrang a neihte a thlen nghal a ni. Minister chuan MSDE hnuaia scheme pakhat, Pradhan Mantri Kaushal Vikas Yojana (PMKVY) chungchanga thawktute’n harsatna an tawh thin te pawh Secretary hnenah hian a thlen a, a mawhphurtute koin a chinfel dan tur ruahmanna an siam nghal a ni. 

Sawrkar laipui in naupang huaisen cfhawi-mawina a siam zinga mi, Sarvottam Jeevan Raksha Padak 2023 chu mahni nunna hlana a nau tui tla a chhanchhuaktu Anthony Vanmawia (11), Tuirial Tlang Veng hnenah hlan a ni a, nimin khan Aizawl DC Er. Lalhriatpuia chuan a chhungte hnenah he chawimawina hi a hlan a ni. He chawimawina hian Medal leh chawimawina thuziak bakah pawisafai cheng nuai hnih a keng tel bawk. Anthony Vanmawia te unau hi April ni 17, 2023 khan an School bang chu Tuirial lui-ah kalin a nau Lalhmunsiama chu chesualin tui-ah a tla a, Anthony-a hian a chhanchhuahna lamah a nun a chan a ni.

Mizoram-a Village Council kalpuina dan hman mek thlakna tur Bill, 'The Mizoram (Village Councils) Bill 2024' chungchanga inrawnkhawmna chu nimin khan a tum hnihna atan Aizawl-a Secretariat Conference Hall-ah neih a ni.

Tunhnaia ruahsur avanga Baktawng Chan In leh Khumtung inkar-a leimin in National Highway-54 kawngpui a hnawh chu thenfai zawh ala nih loh avangin nimin tlai thleng khan helai kawng ah hian lirthei eng chi mah a la kaltlang thei lo.

District Level Implementing Committee on Mission Shakti chu nimin khan Serchhip-ah an Chairman leh District Bawrhsap Paul L. Khuma hovin an thukhawm.

State Election Commission Mizoram in thuchhuah a siam angin Serchhip-III (Chhim Veng) leh New Serchhip North Village Council huamchhung ah General Seat atan By-election buatsaih a nih dawn avangin hetiang hian Serchhip DC leh District Election Officer Paul L. Khuma chuan Political Party te zawm ngei turin thuchhuah a siam.

NATIONAL BRAVERY AWARD For Children, 2024 Indian Council for Child Welfare-in naupang huaisen bikte hnenah kum tina chawimawina (Award) a hlan thin angin kumin ah pawh hian a hlan leh dawn a ni.  Heta ‘huaisen bik’ tih hian nunna atana hlauhawm leh hliam tuar theihna karah pawh thil hlauhawm/khawtlang tana sual dona kawnga huaisen taka lo hmachhawn/beitute a kawk a ni.

Serchhip District-ah nimin khan ASF vanga Vawk thi 16 chhinchhiah niin a tam zawk hi Vawk puitling tawh an ni.

Aizawl Municipal Corporation hmalakna in tun thla ni 22-27 chhung khan hman khat daih (Single Use Plastic (SUP)) zuar dapchhuah hna chu Aizawl Bazarpui leh a chhehvel bakah Veng hrang hrangah thawh a ni a, Dawrkai 26 atangin dan in zawrh leh hman a khap Polythene, disposable Cup, Present tuamna, Plastic hmanga siam fian leh fork te manin heng an thil man hi kg. 114.70 a rit a ni a, pawisa chawi tura tih an ni.

Nimin khan Khawzawl District Level Cooperative Development Committee chu an Chairman leh Bawrhsap K. Vanlalthiana hoin an thukhawm a, Cooperative Society ten Fair Price Shop Dealer hna an thawh theih nana hmalak dan tur te, Damdawi man tlawm zawka zawrh a nih theih nana hmalak leh Cooperative Society ten LPG Dealer hna an thawh theih nana hmalak dan turte sawiho a ni.

Central YMA leh Mizo Language Development Board tangkawpin a buatsaih Branch YMA Chanchinbu enkawltute puala Mizo tawng zirhona chu nimin khan Aizawl-a Central YMA Hall-ah neih a ni a, Aizawl khawpui chhung leh pawn atangin Branch YMA Chanchinbu enkawltu mi 86 zet an tel a ni. Nimin-a he hun hman ah hian Mizo Language Development Board Chairman R. Lallianzuala chuan YMA te nena thawhhona ha tak an nei chu lawmawm a tih thu a sawi a, Central YMA President Lalhmachhuana pawhin Social Media hman kawnga fimkhur a ngaih thu leh Mizo mipuite tana him lo ah chuan Central YMA chuan hma a la zel dawn tih a sawi bawk.

Mizoram sawrkar in a din thar State Level SASCI Committee chu nimin khan an Chairman leh Chief Minister Lalduhoma hovin Planning & Programme Implementation Conference Hall ah an thukhawm a. Chief Minister chuan, Central sawrkarin SASCI inkaihhruaina thar a rawn siam a, chumi mila State ten Project an thehluh a ngai a. Thehluh theih hun bituk hi a tlem tawh avangin Department te an chet vat vat a ngai tih a sawi a. Hei vang hian Committee siamin rang takin thutkhawm hi neih a nih thu sawiin, Central sawrkarin SASCI kalpui tum dan tlangpui leh a ngaihpawimawh thil te a tarlang a. Hnathawh tin te chu tha taka vil zui vek an nih tur thu pawh a tarlang a ni. He thutkhawm ah hian Member Secretary Lalmalsawma Pachuau, Secretary, Planning chuan SASCI inkaihhruaina thar sawifiahin chumi hnuah Department ten hnathawh tur an thehluh te an sawifiah bawk a ni.

Nimin August 29, 2024 khan India rampum-ah ‘National Sports Day’ hman a ni a, Mizoram-ah pawh Sports Authority of India (SAI) State Training Centre, Mission Vengthlang-ah he ni pual hian hun hman a ni.

Mizoram State Project Monitoring Committee Team ‘B’ leh ‘C’ te chuan Aizawl City Centre leh Aizawl City Centre Annexe, New Market, Aizawl sak hna thawh mek te chu niminpiah khan an enfiah.

I&PR Minister Dr. Vanlalthlana chuan Optic Fibre hmangin District Hqrs. te Internet chak zawk pek tuma hmalak mek a nih thu leh hemi hmang hian mipuite'n information an dawn zung zung theih beisei a nih thu a sawi.

Mizoram Lokayukta leh Mizoram Journalists' Association (MJA), Lunglei District te buatsaihin nimin khan Lunglei Sub-Hqrs. YMA Hall-ah 'Anti-Corruption Awareness Campaign 2024' neih a ni.

Mizoram sawrkar-a Minister Lalnghinglova Hmar chuan nimin khan NITI Aayog Member Dr. VK. Paul chu New Delhi-a NITI Aayog Headquarters-ah kawmin Mizoram thalaite tan Mizoram-a Skill Training Centre din chungchang leh Olympic 2036-a Mizo infiammi tam thei ang ber an tel theih nana hmalakho dan tur an sawidun.

Nimin khan Serchhip-ah District Bawrhsap Paul L. Khuma hovin NHIDCL in Serchhip District chhunga NH-54 siam hna an thawh mek chungchang sawiho a ni.

Serchhip District chhung Village Council pahnih a by-election neih tur atan nimin khan hriattirna tihchhuah a ni ta a, inthlan chuh tumte tana hming pekluh theih hun pawh hawn nghal a ni.

Kawng hrang hranga North Vanlaiphai khua tihmingthatute chawimawina hun chu nimin khan North Vanlaiphai SDO (Civil) Dr. Peter Malsawmtluanga kaihhruaina in neih a ni.

Serchhip Auto Rickshaw Owners’ Association chuan nimin khan District Park, Dawngzawl-ah Assembly hmangin Rorelna hun an hman bakah Inthlanna hun an hmang bawk. SAROA-ah hian member 164 an awm mek a ni.

Serchhip District-ah nimin khan ASF vanga Vawk thi 44 chhinchhiah leh niin tunhnaiah Vawk thi an pung leh mek a ni.

Serchhip Bialtu MLA leh Chief Minister Lalduhoma chuan niminpiah, August 27, 2024 khan Serchhip Bial mipui, a hmu duh apiangte tana hmuh theihna hun a Pisa-ah a buatsaih a, he hunah hian Serchhip Bial chhung khaw hrang hranga Bialtu MLA hmu duh mimal leh pawl 80 velin hmuin khawtlang mamawh leh thil pawimawh hrang hrang an thlen a ni.

Ministry of Housing & Urban Affairs hnuaia Swachh Bharat Mission (U) 2.0 kalpui mekah SDO (C) N.Vanlaiphai bultumin nimin khan North Vanlaiphai Presbyterian English School-ah Safai Apnao Bimaari Bhagao (SABB) Campaign chu hlawhtling taka neih a ni a, he hunah hian North Vanlaiphai SDO (Civil) Dr. Peter Malsawmtluanga chuan faina leh hriselna chungchang School Naupangte zirtirna leh hrilh-hriatna hun a hmang a. “Faina hi changkanna a ni a, Campaign neih chhung chauh ni lo, nitin faina hi kan nunpui tur a ni,” a ti. Safai Apnao Bimaari Bhagao Campaign hi School Management Board Chairman  Rev. Jehu Laldintluanga leh Zirtirtuten an hmanpui a ni.

Mizoram Pradesh Congress Committee (MPCC) chuan Mizoram sawrkar in Unified Pension Scheme (UPS) chu sawrkar hnathawk te tan arang thei ang bera an kalpui ve ngei an beiseiin an phut tih an sawi.

Information & Public Relations Minister Dr. Vanlalthlana chu nimin khan Doordarshan News Director Nampibou Marinmai leh All India Radio Aizawl RNU Asst. Director Gin Gangte ten a Pisa-ah hmuin, Mizorama DDK leh AIR ten chanchinthar mipui tanna Public Broadcasting hna an thawh dan leh Mipui tana tangkai zawka hnathawh theih dan tur an sawipui a. Information & Broadcasting (I&B) Ministry hnuaia Central Media Unit hnuaia Information Service-a Mizote an luh tam ve theihna tur hmalak dan tur te pawh thlenin, Information Minister Dr Vanlalthlana chuan Central lama bawhzui dan tur chu ziaka thlen a turin thurawn a pe a ni.

Kolasib District chhunga Bank hrang hrangte hmalakna leh an hnathawh te thlirin Kolasib District Consultative Committee (DCC) leh District Level Review Committee (DLRC) chu nimin khan an Chairman leh Bawrhsap Robert C. Lalhmangaiha hovin an thukhawm.

 Mizoram sawrkar chuan Mizoram State Election Commissioner atan Dr. H. Lalthlangliana MCS chu a ruat thar a, he hna chelh mektu Laima Chozah chu a thlak ang. State Election Commissioner thar ruatna hi niminpiah khan Mizoram sawrkar hnuaia General Administration Department chuan a tichhuak a. State Election Commissioner hian thla khat ah Fixed pay Rs. 2,25,000 bakah hamthatna dang a hlawh dawn a ni. Dr. H. Lalthlangliana hi Mizoram sawrkar hnuaia District Council & Minority Affairs leh Irrigation and Water Resources Secretary nilai a ni.

Mizoram Cooperative Apex Bank (MCAB), Board of Directors thutkhawm chu nimin khan Aizawl Tuikual South-a Board Meeting Room, Head Office-ah neih a ni a, MCAB Chairman Lalnunsanga chuan kaihruaiin thawktu 23 te Service confirmed niin mimal loan cheng nuai 1250 leh Biak In sakna loan cheng nuai 967 pek remtih a ni a. Loan sanction zawng zawng hi cheng nuai 2217 a ni. MCAB hian Branch 28 a nei mek a, kum 2024 chhungin Branch thar 3- North Vanlaiphai, New Colony Siaha leh Ramrikawn te hawn belh remtih a ni bawk. MCAB hian tun dinhmun ah Deposit cheng vbc. 1522.10 neiin Loan cheng vbc. 1199.45 pek a ni a, CD Ratio chu 78.8% a ni mek a ni.

Mizoram State Policy Coordination Committee chu nimin khan Chief Minister Lalduhoma hovin CM Conference Hall-ah thukhawmin Mizoram Sawrkar Flagship Programme, Hand Holding Scheme chu kumin September thla khian hawn (launch) theih tumin a dil duh te tan dilna hun hawn zui nghal nise an ti a. Thlai thar lei tur chungchanga hmalaknate pawh thlirin, Aieng Processing Unit chungchang te, Hmunphiah processing chungchanga rawtna awm te, Hmun-phiah dahkhawmna tur (warehouse) hmalak mek te pawh an sawi bawk.

Art & Culture Department hnuaia Institute of Music and Fine Arts (IMFA) 68th batch Graduation Day chu nimin khan Aizawl Vanapa Hall ah hman niin Art & Culture Minister C. Lalsawivunga chuan a hmanpui a, he hunah hian result puanna leh lawmman semna hun hmangin Zirlaite hnen atangin Cheraw, Tangkawnga Vailak leh Lam dang te entir a ni bawk.

Sawrkar Laipui Department of Consumer Affairs hnen atanga hriattirna dawn angin Champhai District Bawrhsap Pisa kaihhruaina in nimin khan Champhai khawpui chhunga IS 4151:2005 Certified tling pha lo Helmet zawrhte enfiah a ni a. Dawr pali atangin Helmet him tawk lo 130 man a ni. He hunah hian DC Office aiawh, DSCO, SDPO, I&PR, District Consumer Union hruaitute leh Asst Controller, Legal Metrology aiawhte an tel a ni.

Labour, Employment, Skill Development and Entrepreneurship (LESDE) Department changtu Minister Lalnghinglova Hmar chuan nimin khan National Skill Development Corporation-International (NSDCI) hotute kawmin Mizoram thalaite tan Mizoram ngeia Skill Training lian tham kalpui dan tur an sawiho.

Lunglei SP J. Lalmuankima kaihhruaiin Lunglei Traffic Police te chuan dan phal loh Two Wheeler Silencer/Exhaust an man te chu nimin khan an tichhia a, heng te hi ri rin zawng tehna a 80 decibel pel leh a ri ring tura siam danglam a ni.

Aizawl Vaivakawn - Zohnuai kawng-a lei tlahniam leh a bulhnai a In chim mai thei dinhmun a awm te chu nimin zing khan DM&R changtu Home Minister K. Sapdanga leh Minister dangte bakah sawrkar Official ten a hmunah an enfiah.

Kumin chhungin Mizoram-ah Rulchuk report 198 dawn ni tawhin Health Department chuan mipuite chu fimkhut turin an chah.

HIV leh Sex atanga inkaichhawn natna, STI (Sexually Transmitted Infection) chungchang mipui hnena zirtirna beihpui thlakna tur, Intensified IEC Campaign- India Fight Against HIV & STI chu Mizoram-a thla hnih (2) chhung kalpui turin nimin khan Chief Minister Lalduhoma chuan a hawng.

 

Serchhip District Election Officer Paul L. Khuma chuan nimin khan hriattirna tichhuakin Serchhip III (Chhim Veng) leh New Serchhip North VC a General Seat ruak pakhat ve ve hnawhkhah nan September 24, 2024 khian by-election neih a ni dawn tih a tarlang a. Heng inthlanna neihna tur ah hian Model Code of Conduct chu puan nghal a nih thu leh inthlan result puan a nih hma chu lekkawh a ni ang tih a tarlang bawk. He Model Code of Conduct hian Political Party zawng zawngte, Contesting Candidate zawng zawngte leh Village Council inthlanna a inhnam-hnawih Public Servant te a huam ang. Hei bakah hian District Election Officer hian nimin vek khan he inthlanna neih tura Political Party leh Candidate te hriattur pawimawh te a tichhuak bawk a ni.

Inter-District Wrestling Championship vawi 7-na chu Vawiin hian LPS Arena, Falkland, Ai-zawl-ah neih a ni dawn a, Serchhip District aiawh turte chuan nimin khan Aizawl an pan a ni.

Mizoram State Election Commission chuan Mizoram District 8-a Village Council 14-ah September 24, 2024 khian by-election neih a ni dawn tih a puang a, heng VC zingah hian Serchhip District chhunga Village Council pahnih te pawh a tel a ni.

Krishi Vigyan Kendra (KVK) Serchhip District, North Vanlaiphai te chuan Directorate of Groundnut Research, Junaghat, Gujarat hnuaia Badam chi hrang hrang enchhinna an kalpui mek chu nimin khan seng tanin India ram tharchhuah chawhrual khumin Badam tharchhuah theih a ni tih finfiah a ni bawk.

Serchhip District-ah nimin khan ASF vanga Vawk thi 30 lai chhinchhiah belh leh niin African Swine Fever (ASF) vanga kumin a Serchhip District-a Vawk thi chu 2918 a tling tawh.

Power Grid Corporation of India Limited (PGCIL) te'n Corporate Social Responsibility (CSR) kaltlanga Lungsen-I Village Council (VC) tana bawlhhlawh paihna tur lirthei ( Mahindra Bolero Maxx Pik-Up) an pek chu nimin khan Lunglei DC R. Lalthazuala chuan Lunglei DC Office kawt-ah Lungsen-I VC President C. Lalremruata kutah a hlan a. He hunah hian PGCIL General Manager Er. Hranchhuana Sailo chuan Lungsen-I VC te'n thianghlimna kawnga an mamawh tak, bawlhhlawh paihna tur CSR kaltlanga an ngaihtuahsak thei chu lawmawm a tih thu a sawi a ni.

Samagra Shiksha, Khawzawl District hnuaia Khawzawl District-a Sawrkar Primary School leh Middle School thlanchhuah 49 te hnenah  nimin khan Zirtirtuten zirtirna an kalpuinaa an hman tur Tablet semchhuah a ni a, District Bawrhsap K. Vanlalthiana chuan he hun hi hmanpuiin zirtirtute hnenah Tablet hi a sem chhuak a, Zirna In 49 te tan Tablet 101 sem-chhuah a ni. He hunah hian Khawzawl Bawrhsap chuan Zirtirtute chu an zirlaite an damkhaw-chhuah a, an dinchhuah theihna tur thiamna leh finna pe thei tura theihtawp chhuah turin a fuih bawk a ni.

Nimin khan Khawzawl-ah District Bawrhsap K. Vanlalthiana kaihhruainain Khawzawl District chhunga nu leh nau chunga thihna leh nausen thihna thleng thin chungchang ngaihtuah ho a ni a, hetiang chhiatna thleng thin laka invendan leh thihna a lo tlem zawk theih na'n ngun taka zirho a hma thar lak tha an tih thu an sawi a ni. Kum 2023 April - 2024 March chhungin Khawzawl District-ah hian nau piang 284 awmin mipa 149 leh hmeichhia 135 an ni a, nausen thi 6 leh pian hlima thi 10 an awm a, April - July, 2024 chhungin nau piang 72 awmin mipa 45 leh hmeichhia 27 an ni a, naupang thi 1 leh nausen thi 8 an awm thu tarlan a ni bawk.

Nimin khan DIET Mamit buatsaihin Mamit-ah ‘Science Fair’ neih a ni a, he hunah hian Mamit khawpui chhunga Middle School zirlaite chu chhim tura sawm niin DIET-a zirlai naupang 93 te'n an thilsiam chi hrang hrangte chu Science Fair chhimtu zirlai naupangte an lo hrilhfiah a. Middle School Science zirlaibu atangin activity a tam thei ang ber lakchhuah niin Zirlai naupangte-ah Science thiamna leh hmasawnna bakah a taka kalpui dan tur (Practical approach) a pek beisei a ni. Science Fair chhim hian naupang 351 an tel a. Naupang te hi an thil hmuh atanga an zirchhuah (learning outcome) teh sak an ni a. Lawmman buatsaih sak an ni bawk.

Syria ram-a hnathawka awma harsatna tawk, Mizoram sawrkarin tunhnaia a hruai haw mi 3 te chuan nimin khan Chief Minister Lalduhoma chu a Office-ah hmuin lawmthu an hrilh a, an rual hian India ramchhunga harsatna tawk nula pakhat, tunhnaia chhanchhuah pawh a tel ve bawk a ni. Chief Minister chuan Mizoram sawrkar chuan khawvel hmun hrang hranga Zofate hui khawma a tul ang zela tanpuitu tur Mizo Diaspora Cell a din thu sawiin, data lakhawm mekin anmahni rawn bepawptu pawh an awm nual tawh tih a sawi bawk.

Kolasib District Bawrhsap Robert C. Lalhmangaiha chuan tunhnaia kawngchhia avanga Road Block tihtawp ni atanga ni 15 chhungin Contractor lam ten Vairengte leh Khamrang inkar kawng khuar te hnawh zo hman tura an intiam angin hmalak mek a ni tih nimin khan Vairengte khaw chhung kawng chhia leh thil pawimawh dangte sawihona neih ah a sawi a, Vairengte leh Khamr-ang inkar kawng chu cheng nuai 5,000 senga siam that turin hmalak mek a nih thu sawiin, NHIDCL lam pawhin Contractor tur zawngin Tender chhuah an tum mek tih a sawi bawk.

Nimin khan Hnahthial-ah District Bawrhsap Rita Lalnunmawii Pachuau kaihhruaina in Hnahthial-a National Highway-54 kawng chungchang ngaihtuah a ni a, Bawrhsap chuan kawngpui chungchang ah thawhhona tha neih a pawimawh thu sawiin, NHIDCL a ni emaw, ABCI leh Mathiyan pawh ni se hmanrua leh thil dangah harsatna an neih chuan inpuih tlan a tul thu a sawi bawk. He Meeting hian tuna NH. 54 kawng pangngai chu ABCI in lirthei tlan theih reng turin an enkawl ang a, by-pass Road laitu Mathiyan lam pawhin an kawng enkawl te a tha thei ang berin an enkawl ang tiin an rel a ni.

Mizoram Pradesh Congress Committee (MPCC) chuan thuchhuah siamin a rang thei ang bera kawngchhia siamtha turin PWD Minister an phut tih an sawi. Nimin-a Congress Party thuchhuaha tarlan danin Chief Minister Lalduhoma'n ‘ZPM a sawrkar chuan kawng tlo lo chu a tlo nghal vek dawn’ tiin vawi tam tak Campaign-na ah a sawi thin tih an tarlang a. Hetihlaia Aizawl khawpui chhung kawng chhe lutuk leh Mizoram chhung hmun dangah pawh kawng a chhe lutuk chu sawrkar mualphona a ni tih hre nawn a siamtha thuai turin PWD Minister an phut tih an tarlang a ni.

ZPM Party General Hqrs. chuan nimin khan an Party Organisers leh Deputy Chief Organisers te tan sawrkar Flagship Programme, Hand Holding Policy zirchianna an buatsaih.

MNF Party chuan ZPM sawrkar hnuah Assembly Speaker Lalbiakzama Bangla cheithatna leh bungraw lei nan Rs. 23,40,000/- sen a nih thu leh Bangla cheinan bik Rs. 8,40,000/- sen niin bungrua (Sofa, dining table, doormat, etc.) lei nan nuai 15 sen a ni bawk niin an sawi.

Lawngtlai District chhunga Bank hrang hrang te hmalakna thlirin Lawngtlai District Consultative Committee (DCC), District Level Review Committee (DLRC) leh District Level Security Committee (DLSC) chu nimin khan an thukhawm a, he thutkhawm ah hian June thla tawp Quarter thlenga Bank hrang hrangte hmalakna leh an dinhmun te thlirho a ni.

Myanmar lam atanga Mizoram kaltlanga nungcha tawlhruk man chhuah chu a vaiin 166 a tling tawh.

Doordarshan Kendra (DDK) Mizoram Channel-a Educational TV Programme, ‘Zirna Huang’ chhunzawm zel turin School Education Department leh Doordarshan Kendra Aizawl-te chuan nimin khan inremna an ziak.

 

HMANGAIHTU NEILO MIZORAM KAWNGPUI - Rev. Dr. Zaichhawna Hlawndo 

Thla thar September 5-a Zirtirtute ni, Teachers’ Day hman dan tur ngaihtuahin nimin khan Serchhip-ah District Level Committee for Celebration of Teachers’ Day chu an Chairman leh District Bawrhsap Paul L. Khuma hovin an thukhawm.

Nimin khan Serchhip District-ah ASF vanga Vawk thi 46 lai chhinchhiah belh leh a ni a, heng te hi Chekawn-ah 15, Chhiahtlang-ah 13, Then-zawl-ah 7, Khawlailung-ah 3, Baktawng, Serchhip P&E Veng leh Serchhip Chanmari Veng-ah 2 theuh leh East Lungdar leh New Serchhip North-ah pakhat theuh te an ni a, heng te nen hian kumin hian ASF vangin Serchhip District-ah Vawk 2875 a thi tawh a. Nimin khan Vawk 37 suat leh niin heng te nen hian kumin ah Vawk 6154 suat a ni tawh bawk a ni.

Sawhthing Tâm laka beihpui thlakna, ‘Operation Ginger - Fehchhuah Runpui’ chu Serchhip District-ah pawh kalpui mek zel niin nimin khan Serchhip Hmar Veng YMA Hall-ah Sawhthing Tâm chungchang inzirtirna hi neih leh a ni.

Mizo hmeichhia Syria rama hnathawka awm mi pathumte chu Mizoram sawrkâr hmalâkna avângin August 22, 2024 khan Mizoram-ah him taka hruai haw an ni tih ZPM chuan thuchhuah siamin an tarlang a, heng Mizo hmeichhe pathum te hian an hnathawhna Syria rama harsatna an tawk a ni tih sawrkârin a hriat veleh a rang thei ang bera hma la turin Chief Minister-in Mizoram Police thuneitute a hriattîr nghal a, May thla atang khan sawrkârin theihtawp a lo chhuah tawh thu sawiin, Chief Minister, Home Minister leh sawrkâr Official-te hmalâkna chhuanawm an tih thu an sawi a, Ram pawna Mizo awm harsatna tâwkte ngaihtuahtu sawrkâr kan nei chu thlamuanthlak an tih thu an sawi bawk.

Minister Lalnghinglova Hmar chuan nimin khan Meghalaya Deputy Chief Minister, Home Department changtu ni bawk Prestone Tynsong chu Shillong-a a chenna In-ah hmuin kawng hrang hranga State pahnih te thawhdun theih dan tur an sawidun a. Ruihhlo do kawngah State pahnihte tha taka thawhho a tul thu sawiin, a bik takin Myanmar atanga ruihhlo tawlhruk, Mizoram a paltlang hnua Meghalaya-a man awm thin chungchangah, inhriatthiamlohna leh harsatna awm lova State pahnih hotute tlang taka inbiak thin nise tih te an sawi a. Shillong-a Mizo awmte’n harsatna an tawh thinte pawh sawiin, harsatna an neih te inhriattir vat dan turte pawh an sawi bawk a ni.

Department of Personnel & Administrative Reforms changtu Minister K. Spadanga chuan MSSSB thiah a nih hnuah Mizoram Public Service Commission (MPSC) thuamchakna turin sawrkar in hmalakna a neih tawh tih Assembly Session neih zawh takah House a hrilh a. Posts 21 chu MPSC-ah transfer niin hemi hmang hian mi engemaw zat kaisangin, thawktu mi 5 dah belh an nih thu leh Assistant pakhat leh UDC pahnih dah belh lehna tur kalpui mek a nih thu a sawi bawk.

Mamit District Bawrhsap leh District Disaster Management Authority Chairman Jacob Lalawmpuia chuan tunhnai ruahsur avanga Mamit leh Darlak inkar kawng, Tuidai thlanga leimin leh Mamit leh Dapchhuah inkar kawngte a hmuna kalin a tlawh a, Mamit leh Darlak inkar kawng a leimin avanga harsatna tawh mek chu PWD lam thuneitute'n theih ang anga hna an thawh mek thu leh leimin avanga inkalpawhna kawngpui min tel mai thei dinhmuna an din avangin kawnghlui, Mausen Road chu engemaw thut a awm pawha kal theih/zawh theih tura thenfai a nih dawn thu a sawi a. Mamit leh Dapchhuah inkar kawng Fur ruahtui vanga kawng chhe thin pawh hmalak zel dan tur ngaihtuah a nih tur thu a sawi bawk.

Aizawl Municipal Corporation (AMC)-a Ward No. VI-a Corporator a boral avanga tun thla ni 22-a by-election neih a Vote tla te chu nimin khan Aizawl DC Office-ah tluang taka chhiar niin ZPM Candidate H. Lalremtluanga chu thlantlin a ni a, H. Lalremtluanga hian Vote 2354 hmuin amah hnaih bertu MNF leh Congress in an thlawp Independent Candidate Lalrinfeli chuan Vote 2273 a hmu a, Vote 81-a inthlauin BJP Candidate Cbawnghmingthanga chuan Vote 33 a hmu bawk a, NOTA-ah Vote 31 a tla bawk a ni. AMC-ah hian Ward 19 awmin MNF in Corporator 10 an la nei a, ZPM in Corporator 7 neiin INC in 2 an nei bawk a ni.

India hmarchhak State ah Industry hmanga economy hmasawnna chak zawk a thlen theih nana hmalakna, Uttar Poorva Transformative Industrialization Scheme (UNNATI) 2024 chu nimin khan Mizoram tan Commerce & Industries Minister F. Rodingliana chuan a tlangzarh.

Home Minister K. Sapdanga chuan raltlante biometric data lak chungchangah hian Central Sawrkar, Ministry of Home Affairs nen Mizoram sawrkar chu an indawr tawn mek thu a sawi.

BJP Mizoram President Vanlalhmuaka chuan State dang hmasawnna kan hmuh te chu kan kawtkaia awm tur chuan a ngaihna kan hre lo niin a sawi.

Bairabi leh Sairang inkar-a Rel kawng zau chi siam mekah Bairabi leh Hortoki inkar chu Rel tlan phal a ni tawh.

Mizoram sawrkar chuan Land Survey Firm 16-te Empanelment siamin heng Empanelled Survey firm-te hian a taka hna thawk thei turin nimin khan sawrkar aiawhte nen 'Deed of Agreement' an siam a, mipuiten awlsam zawka ram Survey leh Demarcation an kalpui theih nan hna an thawk dawn a ni.

 

Serchhip District tiamin Mizoram chhimlam District thenkhat ah naktuk, August 27, 2024 thleng hian ruah sur tam zual tura ngaih a nih avangin kuthnathawktute chu fimkhur tura chahin an hriattur pawimawh te sawrkar chuan a tarlang.

Serchhip District-ah African Swine Fever (ASF) vanga Vawk thi la awm reng mah se hri lenna chin erawh a zim hret hret niin a lang.

Serchhip Pastor Bial Kristian Thalai Pawl (KTP) te chuan kumin Bial Conference-a an thurel tih hlawhtlinna atan Inrinni khan Serchhip Blood Bank-a dah turin thisen Unit 21 an pe a, thisen petute hi mipa 15 leh hmeichhia 6, an vaiin mi 21 an ni. Serchhip Bial KTP te hian kumin hian thawh thum in thisen hi an pe dawn a, tun tum hi a vawi hnihna niin Serchhip Hmar Veng leh Chanmari Vengthar Branch ten thisen hi an pe a, hemi hmalam hian Serchhip Kawnpui leh Hriangtlang Branch ten Unit 23 an lo pe tawh a ni.

Mizoram sawrkar hnathawk inzawmkhawm pawl, Federation of Mizoram Govt. Employees & Workers (FMGE&W) chuan Zirtawpni khan Aizawl-a Dawrpui Multipupose Hall-ah Special Conference neiin Mizoram sawrkarin Pay Commission din thar tura thutlukna a siam chu New recruits tan chauhva siam pawh ni se Technically-in thil remchang lo a awm bakah Dan Mit atang pawhin him lo a awm thei nia an hriat thu sawiin, State Pay hran siam lova tuna kal dan anga kal an duh tih thlen nise an ti a. Sawrkar hnathawk Health Facility CS (MA) Rules 1944 anga kalpui thin chu sawrkarin Revised Health Care Scheme hmanga kalpui a tum chungchang pawh ngaihtuah bawkin, Revised Health Care Scheme-ah hian thil chiang lo tam tak a la awm a. Hengte chinfel a nih hma chuan sawrkar hnathawkte telh ve rih lo turin sawrkar hnenah thlen ni se an ti bawk.

Kumin January ni 1 leh August ni 12 inkar chhung khan khuarel chhiatna avangin Mizoram-ah mi 42-in nunna an chan.

Central YMA Kumpuan Duty te chuan Inrinni zing khan Aizawl Tuikual South huamchhunga Temple Square-ah Sumo Stand-ah Methamphetamine kg. 9 leh gram 907 manin hemi kaihhnawih ah hian mi pahnih an man bawk a, cheng nuai 45.45 man vel nia chhut niin heng ruihhlo leh mihring an man pahnih te hi Excise & Narcotics Department kutah hlan an ni.

Fire & Emergency Services Department chhinchhiah danin kum 2020 atanga kumin August ni 12 thleng khan Mizoram-ah In kang avanga nunna chân mi 21 awmin, hliam tuar 27 an awm bawk. Chhinchhiahna atanga a lan danin kum 2020 khan kangmei vanga nunna chan mi pakhat leh hliam tuar 7 an awm a, kum 2021-ah nunna chan mi pakhat awm lehin hliam tuar mi 4 an awm thung a. Kum 2022-ah nunna chan nasa taka pungin mi 15 lai an awm a, hliam tuar pawh mi 11 awmin thihna leh hliam tuar awm tam ber kum a ni. Kum 2023-ah nunna chan an awm loh laiin hliam tuar 5 an awm a, kumin ah nunna chan mi 4 awm tawhin hliam tuar erawh an awm lo thung a ni.

Mizoram-a sawrkar inthlak hnu, December 18, 2023 atanga tun thla ni 8 thleng khan Mizoram Police zingah suspend tawk 59 an awm tawh tih Assembly Session neih zawh taka zawhna chhanna ah tarlan a ni a. Home Department chhin-chhiahna atanga a lan danin Police Suspend zingah hian a tam ber chu duty laia zu in leh rui an ni a, Kuhva tawlhruk kaihhnawiha suspend bakah ruihhlo kaihhnawiha suspend an awm a; rukruk vang leh discipline chhia vanga suspend an awm bawk. Slai leh a mu tihchingpen kaihhnawih leh Roll Call laia tlanbo vanga suspend te pawh an awm a, suspend tam ber hi Armed Battalion hnuaia awm an ni a. District Executive Force (SP Office/ Police Station adt.) a awm lai zingah Aizawl leh Saitual DEF-in suspend tawk an ngah ber a ni.

Mizoram Synod hnuaia Family Guidance & Counselling Centre (FG&CC) chuan kumin chhung hian pantu 3725 a nei tawh a, Synod hian Mizoram hmun hrang hrangah FG&CC hi 9 neiin Mission Veng, Bawngkawn. Vaiva-kawn, Champhai, Serchhip, Kolasib, Lunglei, Mamit leh Khawzawl-ah te a ni a, heng FG&CC te hian an din tirh atanga kumin July 31 thleng khan pantu 76,541 an nei tawh bawk a ni.

Myanmar atanga lakluh thin bungraw chi hrang hrang a kal mumal theih loh avangin Zokhawthar leh Myanmar lama Khawmawi a Puakphurtu leh dawrkai bakah lirthei hmanga eizawngtuten harsatna an tawk mek.

Khawvel ram hrang hrangah Monkey Pox vei hmuhchhuah an awm tak nual avangin Mizoram-ah pawh inpuahchahna kalpui mek a ni.

Women & Child Devlopment Minister Lalrinpuii chuan Ruihtheih thil chu tharum thawhna leh hleilenna thlen tirtu pakhat a ni tih sawiin, “Kan tih rem phawt chuan heng thil hi engemawchen a ziaawm phah ngei dawn a ni,” a ti.

All Mizo Veterinary Medical Students' Association (AMVMSA) chuan Inrinni kalta, August 24, 2024 khan an dinchamphaphak vawi 50-na, Golden Jubilee lawmin AH&Vety Minister C. Lalsawivunga chuan a hmanpui a ni.

Aizawl Municipal Corporation (AMC) chuan Aizawl khawpui fai leh thianghlimna turin Mizoram Municipalities Act 2007 leh AMC Solid Waste Management Bye-Laws 2019 hmangin hma an la mek.

Kum 5 kalta 2019-2020 atanga 2023-2024 chhungin Mizoram pawn-a damlo inenkawl tura tirhchhuah ‘refer’ mi 8.972 an awm a. Damlo refer zingah hian Cancer natna vei an tam ber.

Chief Minister Lalduhoma chuan Zirtawpni khan a Pisa-ah Indradhanush Gas Grid Limited (IGGL) a CEO Ajit Kumar Thakur chu kawmin an hnathawhna leh hmalakna te a sawipui a. Indradhanush Gas Grid Limited te hian Tripura atanga Mizoram-a Gas pipeline rawn phum hna thawk mekin Aizawl-a Gas Pipeline Connection kalpui turin ruahmanna an siam mek a ni.

Mizoram-a let duh lova Tripura-a inbenbel thlang Bru chhungkua 6,959-te chu Mizoram Electoral Roll atangin paih fel an ni tawh a, heng Bru-te hi Tripura District pali chhunga khaw 13-ah an inbengbel mek a, an zinga zatve awrh chauh an inbenbelna hi tihfel sak an la ni.

Serchhip Bial chhunga zirna In hrang hranga zirlaite tana intihsiakna, ‘MLA Trophy Inter-School Challenge-2024’ chu nimin khan Govt. High School Serchhip leh Govt. Higher Secondary School Serchhip-ah te neih a ni.

Serchhip District-ah nimin khan African Swine Fever (ASF) vanga Vawk thi 30 chhinchhiah leh niin Vawk 46 chu suat leh a ni bawk.

Horticulture Department hmalakna Serchhip District chhunga Sawhthing T^m beihna, ‘Operation Ginger-Fehchhuah Runpui’ neih mekah nimin khan Serchhip-a Sawhthing chingtute tan New Serchhip YMA Hall-ah Sawhthing T^m chungchang inzirtirna buatsaih leh a ni a, he hunah hian Sawhthing chingtu kalkhawmte chu Sawhthing T^m chungchangah an hriattur leh tihtur pawimawh te a lem nen a zirtirna pein zawhna leh chhan leh sawihona hun hman a ni bawk. Operation Ginger - Fehchhuah runpui hi Serchhip District-a khaw hrang hrangah neih mek a ni.

Serchhip District Sports Committee chu nimin khan an Chairman leh Bawrhsap Paul L. Khuma hova thukhawmin SDSC Sports Complex ram chu a theih anga ranga Land Lease siam an lo rel tawh angin October thla chhung hian a hmunhma samfai leh teh ni se an ti a. SDSC Meeting Hall pawh sum neih sa atangin a theih angin chei that nise, a duh tana man chawia hawhchhuah theih turin buatsaih nise an ti. Hei bakah hian Serchhip District Wrestling Association ten District Wrestling Championship kalna atana sum an dilna pawh pek remtih a ni bawk.

Serchhip Sub-Hqrs. YMA Training & Youth Affairs Committee chuan kumin-a a vawi khatna atan nimin khan Chhiahtlang Higher Secondary School-ah Ruihhlo hmansual leh Zonun Zemawi inzirtirna hun an buatsaih a, he hunah hian T&YA Committee atangin K. Lalrinchhana leh C. Laltlankima ten zirtirna pein hetiang inzirtirna hi zirna In dangah te pawh la neih tura ruahman a ni.

Mizo Zirlai Pawl (MZP) Hqrs. Lunglei chuan nimin khan thutkhawm neiin tun thla ni 17-a Mausen leh Tlawng inkara sumdawng lo suamtu Chakma panga (5) te lung In-ah khung an nih tawh bakah tun thla ni 19-a Borapansury-a Mizo Police kutthlaktute chhuina neih mekah thubuai ziahluh niin Magisterial Inquiry din anih tak avangin Chakma pawnchhuah khap chu nimin tlai dar 4:00 atanga tihtawp an rel a. Thuneitute hmalakna chu enzui zela thil tisualtute man vat an nih theih nan a tul anga hmalak zel nise an ti bawk.

Siaha District Sr. Chief Medical Officer, Dr. Lalnunziri chuan Social Media-ah ‘Monkey Pox hi Siaha Naupang in a kai ta tlat mai, I fimkhur ang u’ tih thu thehdarh chungchang ah Siaha District chhungah Monkey Pox natna hi a la awm loh thu thuchhuah siamin a tarlang.

Mizoram State Project Monitoring Committee (MSPMC) chuan Aizawl Tuikual South-ah Agriculture Growth Centre sak mek chu niminpiah tlai khan tlawhin an hmalakna te an enfiah a, Agriculture Growth Centre hi NEDP sum cheng vbc. 43 senga sak niin Nodal Department chu Agricuture & Farmers Welfare Department a ni a, M/S Northeast Consultancy Services (NECS), Chanmari, Aizawl ten a sak hna hi thawkin Nov. 22, 2022 khan hna tanin Nov. 7, 2025-a zawh tura ruahman a ni a, hna za zela 22 (22%) zawh tawh a ni. MSPMC Team-te hian chak zawk leh tha zawka hna kalpui dan turte pawh thawktute an sawipui bawk a ni.

NITI Aayog hmalakna a State Institute for Transformation (SIT), Planning & Programme Implementation Department, Mizoram tana thawk tur mithiam, Team Lead leh Sector Expert mi pakua (9) te chuan an hna zawm felin nimin khan heng mite hi Chief Minister Lalduhoma chuan a Pisa-ah a kawm a, SIT chu a lo nghahhlel tawh thu leh an lakah beiseina sang tak a neih thu lo hrilhin, Sawrkar thar hmalakna hlawhtlinna tur tam tak chu an kutah a awm dawn tih a lo hrilh bawk a. Dashboard neih thuai a duh thu pawh lo hrilhin, an kal zelna turah duhsakna a hlan a ni. SIT-a Team Lead leh Sector Expert te hian Mizoram Sawrkarin NITI Aayog duh dan leh Viksit Bharat 2047 tih hlawhtlinna te, Mizoram in nasa zawka hmasawnna a neih theih nan te kawng hrang hrangin hma an la dawn a, nimin vek khan an Orientation Course zofelin karleh atang chuan hna an thawk tan tawh dawn a ni.

Nimin khan Lawngtlai-ah khua leh tuite ngaih-sak leh an harsatna chinfel ni, 'Citizen Care- Grievance Redressal Day' hman a ni.

Khelo India State Centre of Excellence (KISCE) a thawktu lak thar te chu Sports Minister Lalnghinglova Hmar chuan nimin khan a Pisa ah kawmin KISCE chu Centre of Excellence a nih ang ngeiin Mizorama infiammi tha ber ber chherchhuaktu nih tum turin a chah a. Sports-a hlawhtling tur chuan a tha ber zinga tel a ngai tih sawiin, induhsakna awm lovin result tha nei ngei turin dik leh taima taka thawk turin KISCE staff lak tharte a chah a. National Games chu sawi loh, Northeast Games-ah pawh Mizoram result a la tha tawk lo tih sawiin, “Midang kan lehpelh theih hmain, an pen ruala pen phawt turin theihtawp kan chhuah a ngai a ni,” a ti. He hunah hian Minister hi Lalramsanga Sailo, Secretary, Sports & Youth Services Department leh H. Lalhmingthanga, Director, Sports & Youth Services te’n an tawiawm a ni.

National Space Day hmasa ber chu nimin khan rampumah hman a ni a, Mizoram-ah pawh he ni pual hian hun hman a ni.

Aizawl-a Assam Rifles ram chhuahsan hnua hman dan turah zau zawka mipuite nena inrawn thaa a hriat thu Chief Minister Lalduhoma chuan a sawi.

Mizoram Journalists' Association (MJA) Kolasib District-ten anmahni puala Pension Scheme an ruahman chu chu nimin khan Bialtu MLA leh Assembly Deputy Speaker Lalfamkima chuan a tlangzarh.

Kolasib District-a lirthei neitu intelkhawmten an District chhunga lirthei tlan an phalloh chu kawng enkawltuten an rawtna an pawmsak avangin nimin chawhnu dar 2:00 khan tihtawp a ni.

Chief Minister Lalduhoma chuan thalaite chu mahni ke-a dinga hna an thawh suau suauna ram siam tura Skill Development uar zel tura chahin, Mizoram-a leilung hausakna kan neih hrang hrangte chhawr tangkai turin Geology lama thiamna sang nei kan mamawh thu a sawi bawk.

Mizoram Board of School Education (MB-SE) chuan kumin-a Diploma in Elementary Education (D.EI.Ed) Exam result chu nimin khan tichhuakin DIET Serchhip atanga Exam ten an titha hle.