Monkey Pox chungchang ah inpuahchah mek a ni

Khawvel ram hrang hrangah Monkey Pox vei hmuhchhuah an awm tak nual avangin Mizoram-ah pawh inpuahchahna kalpui mek a ni.

Zirtawpni khan Aizawl-a Directorate of Health Services Director's Meeting Room-ah Health Directorate Officials te chu thukhawmin Monkey Pox hri leng mek chungchang hi an thlirho a, India ramah hian he natna hri kai hi hmuh la ni chiah lo mah se tunlai khawvelah inkalpawhna a awlsam tawh avangin he hri hian min luhchilh thuai lovang tih a sawi theih a nih loh thu tarlan niin, Core Committee on M.Pox din nghal a ni a, he Core Committee hnuaiah hian Committee peng hrang hrang dinchhawn leh a ni anga. State Level Committee erawh a tul dan angin Higher Authority kaihhruaina in la din chhoh nise an ti bawk.

ZMC chu ICMR lamin Sentinel Site atan a lo puan tawh avangin thuam chaka tihchangtlun chhoh zel a ni a. India rama Laboratory tha zual thlanchhuah 28 zingah telin ZMC pawh hian nikum 2023 December thla atang tawh khan hri pui leng a awm palh pawha lo in rinlawk dan tur ruahmanna a lo kalpui tawh a. ZMC bakah hian Civil Hospital, Lunglei pawh tlema tih changtlun chuan Sentinel Site atan hman mai theih beisei a ni.