AR chhuahsan ram hman dan turah inrawn tha ti

Aizawl-a Assam Rifles ram chhuahsan hnua hman dan turah zau zawka mipuite nena inrawn thaa a hriat thu Chief Minister Lalduhoma chuan a sawi.

UD&PA Department-in ‘Aizawl Hmathlir’ hun niminpiah tlai-a Aijal Club R.B McCabe Hall-a an buatsaih a hmanpuina ah Chief Minister Lalduhoma chuan Urbanization chu khawvel kalphung pakhat a nih thu leh World Bank chhut danin kum 2050-ah chuan mihring hmun thuma thena hmun hnih te chu khawpuiah an cheng tawh dawn tih sawiin, Aizawl pawh a than chak em em thu leh hmathlir fel tak neia kan inbuatsaih a ngaih thu a sawi a. Kumin kumtir lama sawrkar laipuiin Aizawl chhuah lam leh tlak lam by-pass Road thawhna tur a sanction chu a hlawhtlin hunah chuan Aizawl khawpuia lirthei tawt lutuk a ziaawm hlein a rinawm tih a sawi a, Assam Rifles ram chhuahsan hman dan tur chu zau zawka mipuite nena inrawn thaa a hriat thu leh ICCC hmalakna chu Aizawl enkawlna hmanraw pawimawh tak a nih thu te a sawi a ni.

He hunah hian UD&PA Department changtu Minister K. Sapdanga chuan inlawmna thu sawiin, Aizawl Hmathlir chu UD&PA hnathawh tawh te, thawh mek te leh hmachhawp awm te inhrilhhriatna a nih thu a sawi bawk a ni.

‘Aizawl Hmathlir’ hun-ah hian mithiam hrang hrangin thupui thlanbik hmanga thu sawiin, Aizawl khaw chhunga veivahna tha zawk ruahman chungchang te; khawpui faina kawnga hmalakna te; Integrated Command & Control Centre hnuaia Aizawl khawpui himna atana hmalakna te tarlan niin Hmun 76-ah CCTV dah a nih tawh thu te, hmun 14-ah Automatic Number Plate Recognition System dah a nih tawh thu te, hmun 15-ah Free Public Wifi dahin Environmental Sensors chu hmun 4 leh Facial Recognition System chu hmun 5-ah dah a nih tawh thu te tarlan a ni.