CBI General Consent pek chungchang sawifiah

Chief Minister Lalduhoma chuan CBI hnena General Consent pek danah an sawrkar hnuaiah danglam bik chu a awm ngei tih sawiin, venthawn neih erawh a ngai tih a sawi.

Mizoram Legislative Assembly thutkhawm neih zawh takah Vigilance changtu Chief Minister Lalduhoma chuan, Central-ah eng Party emaw an sawrkar a, State-ah Party dang an sawrkar a, State-a an party er zawng tak sawrkar kha tihchhiat duh ta se, State sawrkar hnuaia thawk an duh duh kha rawn chhuiin rawn khawih ta se, sawrkar a intihchhiat theih dawn tih a sawi a. Chu chu tuna Central-a BJP sawrkarin West Bengal-a hma a lak danah pawh a thleng mek tia sawi theih a ni tih a sawi a ni.

An sawrkar veleh an ngaihpawimawh avangin CBI hnenah consent an pe tih Chief Minister chuan sawiin, MNF sawrkarin a pek dan nen a danglamna a awm lo nia sawi awm bawk mah se, MNF sawrkar chuan consent an pe lo a, anni chuan an pe nghal tih a sawi a. Criminal Law thar hman a nih hnuah hei a valid ta lo vek a, consent pek that leh a ngai, tiin a form dahkhah tur an duansa hmangin an chhang a, a kar awl awm loin General Consent an pe zui tih a sawi a. “A hmingah chuan 'General Consent' a la ni reng a, State sawrkar hnuaia thawkte a huap ta lo a ni. Tu pawh sawrkar se, hei bak hi kan ti thei lo,” a ti a. Amaherawh chu kan Investigating Agency - Lok Ayukta, ACB ten CBI-ah pek ni rawh se, tia an rawtna chu keini chuan remtih zel kan tum,” a ti bawk.