Sawrkar tirha minus kha an plus tawh niin sawi

Chief Minister Lalduhoma chuan an sawrkar tirh-a RBI balance cheng vbc. 300 chuanga an minus chu sawrkar kumthar chuankai chiah khan vbc. 500 chuangin an plus hman tih a sawi.

Assembly Session neih zawh takah Finance changtu Chief Minister Lalduhoma chuan sawrkarin leiba a ngah si a, an policy duante an kalpui thei tak tak dawn em ni, tia House member-ten an zawhna a chhang a. An sawrkar tirhin leiba vbc. 13,584 an chhawm a, an theih theih an inrul fel a, chuti maia rulh zawh theih chi erawh a ni lo tih a sawi a. An sawrkar tirhin RBI balance minus vbc. 398 an nei a, theihtawpin tan an la a, sawrkar kum tawp a ral hnu, April 1 khan minus atangin plus vbc. 520 ah an chho hman tih a sawi a ni.

Hetihlai hian ziaka Chief Minister-in zawhna a chhannaah sawrkar thar lakluh ni, 2023 December 8 atanga kumin June inkarah Mizoram sawrkarin cheng vbc. 909.85 a puk tawh a, “Puk lo chuan tumah kan awm thei lo. Puk tura pass tlan vek tawh kan puk a, thil thar anga sawi vak tur a ni lo. Thil danglam erawh, sawrkar hmasaa Ways and Means-in kum khat chhunga vbc. 1000 lak tumin an dah chu, keini chuan nuai 3 lak kan tum. Kan rulh ve zel thin chhiar tel loin kan puk zat chiah an chhiar thin a, Ways and Means ah hian puk zat a lang tam ta a ni,” a ti.