ASF vangin Vawk thi leh suat ala awm belh zel

Serchhip District-ah nimin khan African Swine Fever (ASF) vanga Vawk thi 30 chhinchhiah leh niin Vawk 46 chu suat leh a ni bawk.
Serchhip District-a ASF hri lenna khua ah te hri avanga Vawk thi a la awm belh zel a, AH&Vety Department ten an chhinchhiahna atanga a lan danin nimin khan Veng leh khua 6-ah Vawk thi 30 awm lehin heng zinga 15 chu Thenzawl khuaa mi te an ni a, Serchhip Chanmari Veng-ah 6 thi bawkin New Serchhip South leh Dinthar Veng-ah 6 ve ve, Baktawng-ah pahnih leh Chhiahtlang-ah Vawk pakhat te an thi leh a ni. Nimin vek khan Veng leh khua 7-ah Vawk 46 zet suat leh a ni bawk a, heng zinga 21 te chu Serchhip P&E Veng-a suat te niin New Serchhip North-ah 10, New Serchhip South leh Baktawng-ah 4 ve ve, Lungchhuan-ah 3 leh Chhiahtlang leh Serchhip Dinthar Veng ah pahnih ve ve suat a ni bawk.

Heti hian nimin thleng khan Serchhip District-a Veng leh khua 30-ah kumin chhung hian ASF vanga Vawk thi 2786 zet an awm ta a, hri leng darh zel tur venna atan Vawk 6072 suat ni tawh bawkin Vawk hri leng avang hian chhungkaw 1782 ten harsatna an tawk tawh a. Hri leng hi darh zel tawh rih lo niin lang mah se hri len tawhna ah te erawh Vawk thi hi a la awm belh zel a ni.