Chief Minister in thalaite chu Skill Development uar zel turin a chah

Chief Minister Lalduhoma chuan thalaite chu mahni ke-a dinga hna an thawh suau suauna ram siam tura Skill Development uar zel tura chahin, Mizoram-a leilung hausakna kan neih hrang hrangte chhawr tangkai turin Geology lama thiamna sang nei kan mamawh thu a sawi bawk.

Pachhunga University College-in National Institutional Ranking Framework-a India rama College tha thlanna an buatsaiha 35-na an nih lawmna hun nimin-a PUC Seminar Hall-a an buatsaih a hmanpuina ah Chief Minister Lalduhoma chuan India rama College tha thlanchhuah zinga tel hial khawpa PUC in hma a lo sawn ta chu ropui a tih thu sawiin, he dinhmun a thlen theih nana beitute zawng zawng chungah lawmthu a sawi a. Zirna tha zawk Mizoram-a a awm theih nana a kaihhruai sawrkarin ruahmanna a siam tlangpui tarlangin, “Hriselna leh zirna lama sum sen hi kan sawrkar chuan expenditure-ah kan ngai lova investment a ni,” a ti.

Chief Minister chuan Mizorama leilung hausakna kan neih hrang hrangte chhawr tangkai turin Geology lama thiamna sang nei kan mamawh thu pawh sawiin, he College-a Geology zirna a awm mek avangin lo tang zel turin a chah a. “Thalaiten mahni ke-a dinga hna an thawh suau suau na ram siam turin Skill Development uar zel ang u,” tiin “Hand Holding Policy kan tan dawn hnai a, thawhpui tlak thalaite chu tumah thlei bik nei lovin cheng nuai 50 thleng loan awlsam an lak theihna, Interest Free ni bawk si kan chhawp dawn a ni. Hetiang Policy nei State awmchhun hi kan ni mek a. He hmalakna chhawr thei thalai, mahni ke-a ding tlak thiamna nei, thawhpui tlak lo buatsaih ula, Vawii-na zirlaite pawhin chutiang mi chu nih rawn tum ang che u,” tiin a sawm a ni.

He hun hi PUC Principal Prof. H. Lalthanzara chuan kaihruaiin Education Minister Dr. Vanlalthlana pawhin thu a sawi a, Prof. Lalhriatzuala, Asst. Coordinator, IQAC chuan National Institutional Ranking Framework in tehfung hrang hrang hmanga zirna In tha an teh dan sawifiahin, kum 2018 atanga an tel thu leh kumin hian College 3371 inelin 35-na an nih thu a sawi a ni.