Thenzawl-a sa zawrhna hmun tur sawiho a ni
Nimin a thutkhawm SDO (Civil) Conference Hall-a neih ah hian thutkhawm kaihruaitu SDO (Civil) K. Lalhlimpuia chuan hun hmasa lamah SDO(C) Office chu a hmunah thutchilh a nih loh avangin tih tur awm tak tak tih loh a awm ang tiin, khawtlang hmasawnna hrang hrang a tihtur awmte a hmuna a thutchilh hnuah hmalak chhoh zel tum a nih thu a sawi a. Faina chungchang ah tan lak a tul thu te, ruihhlo dona kawngah tan lak a tul thute sawiin, Thenzawl khua in hma a sawn zelna turin tun hun thlir mai lova kum 50 hnu lam thlir chunga ngaihtuahna seng thar turin khawtlang hruaitu kalkhawmte a chah a. Khawtlang hmasawnna turin khawtlang hruaitute leh tlawmngai pawl hrang hrang hruaitute nena thawhona tha tak an neih a tul thu sawiin, an hmalakna zel turah thawhchhuahna tam tak a awm dawn avangin rilru zau tak pu chunga thawho puiah a sawm bawk.
He thutkhawm-a tel te hian Thenzawl khuaah thianghlim zawka Sa hralhchhuah a nih theih nan tuna Sa zawrhna awmsa atangin thla thar atang chuan Commerce & Industries Department hnuaia Thenzawl East Market building ah insawn tura ngen leh hriattir nise, a tul anga thuchhuah siam nise an ti a. Thianghlim zawka Sa talh a nih theih nan Thenzawl-ah Sa talhna hmun 'Slaughter House' a awm ngei theih nan hmalak nise an ti bawk. Sa zawrhna bakah hian kawngpui dunga chawhmeh zuar chhuak thin te pawh Thenzawl East Market Building-ah hian insawnlut vek tura ngen leh hriattir ni se tiin, hemi kawnga hma la turte an inruat nghal bawk a ni.
He thutkhawm ah hian AH& Vety leh Commerce & Industries Department aiawh bakah VC leh Thenzawl Sa Ser Association hruaitute an tel a. Meeting zawh hnu hian Thenzawl East Market building leh Slaughter House sakna hmun tura an sawilan te a hmunah an tlawh nghal bawk.
Comments
Post a Comment