Serchhip District chhung thingtlang khuaa tawih thei lo bawlhhlawh lakkhawm dan tur sawiho

Serchhip District chhung thingtlang khaw hrang hrangte tana Plastic Waste Management Centre neih leh hman tangkai dan tur chungchanga inrawnkhawmna chu nimin khan Serchhip DC Conference Hall-ah neih a ni.
Project Management Unit (PMU) Mizoram leh PHE Department Serchhip WATSAN Division tangkawp buatsaih Serchhip RD Block leh E.Lungdar RD Block huamchhunga WATSAN Committee te tana ‘Consultation Meeting on Plastic Waste Management Centre’ hi PHE Department-a PMU Director Er. H. Duhkima chuan khuallian nia hmanpuiin Plastic atanga thilsiam te chu thil hman nuam leh awlsam a nih avangin mitinin kan hmang uar a, amaherawhchu kan environment a tihchhiat nasat avang leh kan ram lui te a tibawlhhlawh nasat avangin hman tawh loh kan inzirtir a ngai a ni, a ti a. Hman khat daih plastic hman hi danin a khap bakah National Green Tribunal (NGT) chuan bawlhlawh hal leh paih a khap thu sawiin, Serchhip District-ah Waste Management hlawhtling taka kan kalpui theih nan sawrkar leh mipuite thawhona tha neih a tul thu a sawi bawk.

Nimin-a he hun hman hi PHE Serchhip WATSAN Division-a Sr. EE, Er. Isaac Lalchhuanmawia chuan kahruaiin Serchhip Addl. DC Lalrinzuala chuan duhdah taka bawlhlawh paih chuan a thalo lamin nasa takin nghawng a nei thin tih a sawi a. Bawlhlawh sawngbawlna kawngah PHE leh UD&PA Department te hmachhawp leh DC Office hnuaia din ‘District Convergence Plan on Solid Waste Management’ chungchanga mawhphurtu tur bik ruahmannna siam a nih thu te, Serchhip District chu Mizoram mipuite entawn tlak ni tur leh District fai ber ni thei tura hmalak a nih tur thute a sawi a. District chhung khaw hrang hrang atanga khawtlang hruaitu kalkhawmte chu bawlhlawh thliarhran dan tur inzirtirna kawngah thawhhona tha tak nen tan la thar leh theuh turin a fuih bawk a ni.

He hunah hian Thenzawl-a ‘Plastic Waste Management Centre’ aiawhin PC. Lalnunpuia, Green Herd Pvt.Ltd chuan Serchhip District chhung thingtlang khuaa bawlhhlawh tawih thei lo lakkhawm an tum dan leh sawngbawl an tum dan te a sawifiah a, hemi hnu hian WATSAN Committee aiawhte hian sawihona hun hmangin September 15, 2024 hmain Gram Sabha ko in mipui remtihna lak nise, chumi hnuah hetianga inrawnkhawmna hi neih leh nise an ti a ni.