MJA Kolasib District-ten anmahni puala Pension Scheme an ruahman tlangzarh a ni

Mizoram Journalists' Association (MJA) Kolasib District-ten anmahni puala Pension Scheme an ruahman chu chu nimin khan Bialtu MLA leh Assembly Deputy Speaker Lalfamkima chuan a tlangzarh.

MJA Kolasib District in anmahni puala Pension Scheme an buatsaih tlangzarhna hun Kolasib Press Club-a neih ah hian Deputy Speaker chuan Kolasib District MJA ten Pension Scheme ruahmanna chang an hria chu lawmawm a tih thu a sawi a. Mihring-ah hmalam hun atana ruahmanna nei thiamte an hlawhtling mai thin tih sawiin, Healthcare-ah pawh sawrkarah kan innghahna piah lamah mimal leh khawtlang huap pawha tih theih a nih dante kan zirchian a ngai a; ngaihtuahna hmang thiam apiang an vannei mai a ni, a ti a. MJA member-ten an pension hnua Mai par thlawn mai lova pawisa tlem azawng an chhuahpui theih tura ruahmanna siam nachang an hria chu Kolasib District MJA ten a nachang an hriatna bakah huaisenna a ni tih a sawi a. He Scheme kalpuina kawngah harsatna te pawh a la awm mai thei tih sawiin, chhungte pawh chu inhnehtir mai lova bei chho zel turin a fuih a, an kal zelna turah duhsakna hlanin Pension Scheme bul tanna atan cheng nuai khat (1) a tumsak tur thu a sawi bawk a ni.

He hunah hian MJA Kolasib District President Andrew Vanlalauva chuan tuna Pension Scheme an tlangzarh tak hi District dangte kalpui dan entawn chungin leh Bank lama thawktute nena inrawnkhawmna neih hnuah hrual mum a nih thu a sawi a. Kolasib District chauh hi Member-ten mahni thawhchhuah hmanga Pension Scheme siam an nih thu leh Member-ten pension kum an thlen huna pawisa tlem azawng an lo khawl theihna tura ruahman a nih avangin member-te pawhin Pension Scheme-a sum dah tur tuakna kawngah theihtawpa tan lak a ngaih thu a sawi a ni.

MJA, Kolasib District Pension Scheme tlangzarhna inkhawm hi Vice President C. Zomuanpuia chuan kaihruaiin Secretary Lalthazuala chuan Pension Scheme a sawifiah a. He Scheme hnuaiah hian MJA Member te hian sum an thawh thin dawn bakah an pawl in a remchan angin sum a dahlut thin anga, hei hi an pension hunah MJA Member te hian an lalet thei dawn a, hei mai bakah hian damlo inenkawlna atana mamawh an awm a nih chuan midang sum thawh khawih lovin mahni sum thawh theuh hi a tul angin an hmang thei dawn bawk a ni.