Raltlan te Biometric data lak thu ah indawr tawn mek

Home Minister K. Sapdanga chuan raltlante biometric data lak chungchangah hian Central Sawrkar, Ministry of Home Affairs nen Mizoram sawrkar chu an indawr tawn mek thu a sawi.

Mizoram Legislative Assembly Fur thutkhawm neih zawh takah Home Department changtu Minister K. Sapdanga chuan ziaka zawhna a chhanna-ah he thu hi a sawi a. Home Department-in a chhinchhiah danin, kumin August ni 13 thleng khan Mizoram chhunga raltlan awm zat chu 43,737 an nih thu a sawi a. Myanmar rama Sipai-in mipui thlan sawrkar an paihthlak avang leh chumi kal zela tualchhung indona avanga an sahimna zawnga Mizorama rawn raltlante chu mi 33,724 an ni tih a sawi a. Bangladesh Chittagong Hill Tracts atanga raltlan rawn lut awm mekte chu mi 2,014 niin Manipur-a chi leh chi inkara buaina chhuak avanga rawn tlanchhia, tuna awm mekte chu mi 7,999 an nih thu Home Minister chuan a sawi a ni.

Home Minister chuan raltlante tanpuina leh enkawlna atan hian sawrkar laipui chuan cheng vbc. 8 a rawn pe tawh niin a sawi bawk a. Heng zinga cheng vbc. 3 chu sawrkar hmasa MNF hun lai a rawn pek a nih thu leh tun sawrkar ah hian cheng vbc. 5 a rawn pe leh tawh niin a sawi bawk.

Sawrkar hmasa hun lai a central sawrkar in tanpuina a rawn pek chu raltlante buhfai ei tur, damdawi leh an chenna tur sakna atan te hman a nih thu leh District Bawrhsap te’n anmahni enkawlna atana an lo hman ral tawh rulhna, a bik takin sawrkar atanga a bathlau-a buhfai an lo lak tawh rulh nan te hman a nih thu Minister chuan a sawi a. Tun sawrkar huna cheng vbc. 5 an dawn chu hman a la nih loh thu leh Consumer Affairs, Food and Public Distribution Ministry in buhfai an rawn pe dawn a, chu chu an mamawh dan zela sem a ni dawn a ni, a ti bawk.