Kolasib District-a kawngpui dan tihtawp a ni

Kolasib District-a lirthei neitu intelkhawmten an District chhunga lirthei tlan an phalloh chu kawng enkawltuten an rawtna an pawmsak avangin nimin chawhnu dar 2:00 khan tihtawp a ni.

Kolasib DC Conference Hall-ah nimin khan Kolasib Bawrhsap Robert C. Lalhmangaiha kaihhruaiin sawrkar hotute, kawng enkawltute leh lirthei neitute chu an thukhawm a. Hetah hian lirthei neitute chuan Kolasib District huamchhunga Mizoram chak lakna kawngpui, National Highway Division-III, PWD enkawl Bairabi - Zero Point, Bilkhawthlir - Kolasib leh Kawnpui - Khamrang chu nimin August 23, 2024 atanga thla khat chhungin kawngpui khuar lai hnawha pangngai taka kal theihna turin an siamfel hman tur a ni tih an rawt a. Hei bakah hian Kolasib District huamchhunga Mizoram chak lakna kawngpui NHIDCL enkawl Sethawn RTP Workshop kawngchhe lai leh Kawnpui quarry kawng chhe lai chu an lo intiam tawh angin nimin atanga ni 15 chhungin an siamtha hman tura an rawt bakah heng hmalakna tur hi Kolasib Bawrhsap in ti hlawhtling ngei turin theihtawp chhuah in hma ala zui nghal ang tihte an rawt a. Heng an rawtna hi pawmsak an nih avangin kawng dan hi an titawp ta a ni.

Tarlan tawh angin niminpiah chawhma dar 10:00 atanga Kolasib District-a lirthei neitu leh Driver pawl hrang hrang panga te chuan Vairengte leh Sairang inkar bakah Bairabi leh Kolasib inkar Kawngpui, National Highway te siamthat phutin kawngpui hi an dangchat a, hemi avang hian boruak duhawm lo thleng erawh a awm lo a ni.