MLA Trophy Inter-School Challenge 2024 neih a ni

Serchhip Bial chhunga zirna In hrang hranga zirlaite tana intihsiakna, ‘MLA Trophy Inter-School Challenge-2024’ chu nimin khan Govt. High School Serchhip leh Govt. Higher Secondary School Serchhip-ah te neih a ni.
Serchhip Teachers Association (STA) in an kum 50-na, Golden Jubilee lawmna puala an buatsaih 26-Serchhip (ST) A/C huamchhunga zirlaite tana an zirlai kawng hrang hranga inelna, ‘MLA Trophy Inter-School Challenge-2024’ ah hian Primary School atanga DIET/College zirlaite thlenga inelna siam niin Category 7-ah inelna hi neih a ni a, Primary School Section-ah zirlai 28, Middle School Section-ah zirlai 28, High School Section-ah zirlai 36, Higher Secondary School Section-ah zirlai 34 leh College leh DIET Section-ah zirlai 24, an vaiin zirlai 150 an tel a, Primary leh Middle School Section-ah hian sawrkar School leh Sawrkar School ni lo te chu Category hran ah inelna hi buatsaih sak an ni.

He intihsiakna ah hian Category hrang hrangah zirlaite hian an zirlai Subject hrang hrang atanga zawhna siam te chu hun bituk siamin an chhang a, hei hi an zirlai-a hmasawnna an neih zel theih nana ruahman niin Category hrang hrangah hian lawmman siam a ni dawn a, he intihsiakna a lawmman te hi Bialtu MLA leh Chief Minister Lalduhoma chuan tum sakin hun remchang ah result puangin lawmman sem a ni ang. MLA Trophy Inter-School Challenge hi nikum lamah hlawhtling taka neih a lo ni tawh bawk a ni.