Rampum-ah National Space Day hman a ni

National Space Day hmasa ber chu nimin khan rampumah hman a ni a, Mizoram-ah pawh he ni pual hian hun hman a ni.

Nikum August ni 23 khan India chu Thla leilunga tum thei ram zinga palina niin khawthlang lam Polar Bial thleng hmasa ber a ni bawk a. He hlawhtlinna ropui tak hriatrengna atan hian August ni 23 hi ‘National Space Day’ ah puan a ni a. Kumin hian thupui-ah ‘Touching Lives while Touching the Moon: India's Space Saga’ tih hman niin Vanthengreng chanchin zirna leh hmasawnna in khawtlang leh tunlai thiamna hrang hrangah nghawng thui tak a neih dante uar zawka sawi a ni.

National Space Day lawmna pui ber hi New Delhi-a Bharat Mandapam-ah hman niin India President Droupadi Murmu chuan Robotics Challenge leh Bhartiya Antariksh Hackathon-a chak te chawimawina a hlan a. President chuan India Space Sector hmasawnna ropuizia leh hmanraw tlemte hmanga Sikeisen (Mars) Mission tihhlawhtlin a ni emaw, tum khata Satellite za chuang hlawhtling taka kahchhuah emaw pawh ni se, thil ropui tak tak kan ti thei a ni, a ti a. Hmanraw tlemte hmangin kan ram Scientist inpe tak takte chuan India Space Programme chu khawvela a tha ber pawlah an siam tih a sawi bawk a ni.

Ramchhung hmundangte rualin Mizoram University, Auditorium-ah pawh ‘National Space Day’ hi hman a ni a, Prof. Suman Rai, Dean, School of Physical Sciences chuan he hunah hian inlawmna thu sawiin, Prof. R.C. Tiwari, Senior Professor, Dept. of Physics, MZU chuan India in vansang zirna lama hmalakna aneihte leh an hmunhma chungchangte a sawi a, Kualllian nia he hun hmanpuitu Prof. Pravakar Rath, Pro Vice Chancellor, MZU chuan Vanthengreng chanchin hriat a pawimawhna te a sawi bawk.