I&PR Minister hnenah DD leh AIR hnathawh dan hrilh

Information & Public Relations Minister Dr. Vanlalthlana chu nimin khan Doordarshan News Director Nampibou Marinmai leh All India Radio Aizawl RNU Asst. Director Gin Gangte ten a Pisa-ah hmuin, Mizorama DDK leh AIR ten chanchinthar mipui tanna Public Broadcasting hna an thawh dan leh Mipui tana tangkai zawka hnathawh theih dan tur an sawipui a. Information & Broadcasting (I&B) Ministry hnuaia Central Media Unit hnuaia Information Service-a Mizote an luh tam ve theihna tur hmalak dan tur te pawh thlenin, Information Minister Dr Vanlalthlana chuan Central lama bawhzui dan tur chu ziaka thlen a turin thurawn a pe a ni.

Hei bakah hian Indian Institute of Mass Communication (IIMC) Mizoram hmalakna leh inrelbawl dante pawh Minister hnenah hian sawiin, a hmunhma te enfiah a hun hmang turin I&PR Minister hi an sawm bawk.