Operation Ginger - Fehchhuah Runpui neih mek zel a ni

Sawhthing Tâm laka beihpui thlakna, ‘Operation Ginger - Fehchhuah Runpui’ chu Serchhip District-ah pawh kalpui mek zel niin nimin khan Serchhip Hmar Veng YMA Hall-ah Sawhthing Tâm chungchang inzirtirna hi neih leh a ni.
Horticulture Department buatsaiha ‘Operation Ginger - Fehchhuah Runpui’ nimin-a Serchhip Hmar Veng YMA Hall-a neih hi Serchhip Multi-Purpose Society-a Chairman T. Zapuithanga chuan kaihruaiin Serchhip-a Horticulture Department Senior Horticulture Demonstrator T. Kapvela chu Resource Person atan hman a ni a, Horticulture Department ten Sawhthing Tâm chungchang inzirtirna an kalpui mek chu tlai luat a awmloh thu leh kumin mai ni lo, nakum leh a kumleh thlenga Sawhting chingtute tan a thilpawimawh anih thu a sawi a. Sawhthing chingtu kalkhawmte chu Sawh-thing Tâm chhan leh a enkawl dan turte, an hriat tur leh tihtur pawimawh te a lem nena zirtirna pein, Sawhthing Tâm venna damdawi chi hrang hrang hman dante a hrilhfiah bakah 'Sawhthing natna te, a bawmtu rannungte leh a enkawl dan' tih Booklet chu sem nghal an ni bawk.

‘Operation Ginger - Fehchhuah Runpui’ hi tun thla ni 16 atang khan Mizoram hmun hrang hrangah kalpui niin Serchhip District-ah pawh khaw engemaw zat tuam a ni tawh a, nimin-a he hun hman ah hian Sawnthing chingtu mi 30 vel an tel a ni.