Serchhip District-a Zirtirtute Ni hman dan tur rel a ni

Thla thar September 5-a Zirtirtute ni, Teachers’ Day hman dan tur ngaihtuahin nimin khan Serchhip-ah District Level Committee for Celebration of Teachers’ Day chu an Chairman leh District Bawrhsap Paul L. Khuma hovin an thukhawm.
Serchhip DC Meeting Hall-a thutkhawm neih ah hian Bawrhsap chuan Zirtirtute pawimawhzia sawiin, Zirtirtu tha chuan Zirlaibu inthiamtir ngawt piahlamah zirlai naupangte an lo putlin thlenga an rilru puthmang leh sukthlek danah, an hnathawhna ah te, mi dangte nena an inlaichinna kawngah te, nun kawng dik an zawh zel theihna atana kaihruaitu an ni, a ti a. “Chuvangin, Zirtirtu tha te hian chawimawi an phu a, theihtawp chhuaha kan chawimawi pawh a tul a ni,” a ti.

He thutkhawm a tel te hian Teachers’ Day 2024 hi Serchhip District-a zirna In hrang hrangte chuan anmahni remchan angin hmang se an ti a, School Education Minister thuchah chu chhiar chhuah tura tih a nih bakah Serchhip DC in Cable TV leh Social Media hmangin Zirtirtute chibai bukna thu a sawi sawi bawk anga. Serchhip khawpui chhungah leh Sub-Division ah te Teachers’ Day pualin Banner tar a ni bawk ang.

Teachers’ Day 2024 denchhen hian Ser-chhip District chhungah Zirtirtu tha chawimawi tlak thlangchhuakin, Chawimawina hlan leh tura rel a ni bawk a. A thlangtu tur atan Serchhip DEO kaihhruaina hnuaiah Working Committee din niin he Committee hian Award hming tur te, a thlan dan tur tehfung te leh a thlan awm mi te a ngaih-tuah anga, District Level Committee-in an enho leh dawn a ni.

Hei bakah hian National Foundation for Teachers’ Welfare (NFTW) Fund atan Zirtirtu ten Rs.200 theuh an thawh dawn a. NFTW Fund atang hian Zirtirtu natna khirh vei te leh harsatna tawk ten tanpuina an dil thei a, Sawrkar leh Private School zawng zawng a huam vek a ni.