Chin Brotherhood leh ICNCC te inkawmna nei

Inremna zawnga ZORO ten hma an lakna kal mekah nimin khan Chin Brotherhood hruaitute, Interim Chin Nation Consultative Council (ICNCC) hruaitute leh ZO Re-Unification Organisation (ZORO) hruaitute chu Aizawl-a ZORO Office-ah an inkawm.

Myanmar Chin State-ah hian Chinland Government/Chinland Council leh Chin Brotherhood/ICNCC te chuan inhmuhthiam lohna neiin Silai hial an lek a, hei hi ZORO chuan tha ti lovin Unau vek kan nih avanga in hmu thiam lo tur kan ni loh avang leh inlungrual taka awm tur kan nih avangin an inkarah remna palai hna a thawk mek a. Hemi kal zelah hian he inbiakna hi neiin Chin Brotherhood hi Defence Secretary Timmy Lalliana'n hovin, Interim Chin Nation Consultative Council (ICNCC) hi Salai Lian Luai, President ICNCC in a ho bawk a ni.

ZORO Vice President Rohmingthanga Kawlni kaihhruaia he inbiakna ah hian ZORO General Secretary L. Ramdinliana Renthlei chuan thutkhawm an neih chhan sawiin, “Unau kan ni a, inthen thei kan ni lo, indo thei pawh kan ni lo tihah hian kan chian a ngai hle a. Unau thlahkhat kan nih angin Pathian in engtika emaw chuan min la suihkhawm ang tih hi kan ring tlat a ni. Chuvangin unau indo hi a tha lova, kan inrem a ngai a, Zofate chu lungrual taka awm hi kan duh a, kan pawl thil tum pawh a ni a, hei hi remna palai hna kan thawhchhan pawh a ni,” a ti.

He hunah hian ICNCC President Salai Lian Luai chuan Remna kawng zawha ZORO in hma an la chu tha an ti hle tih sawiin, “Keini ho hi thinlung takin remna min siamsak induh tih kan hria a, remna kan neih theih nan tan min laksak zel turin ka sawm che u a ni,” a ti a. Chin Brotherhood Defence Secretary Timmy Lalliana pawhin Remna chungchanga nimin-a an inhmuhkhawmna chu a bultanna nise tiin, “Zofate inkarah inlungrualna thleng zel se tih hi kan duh dan a ni. Keini chuan inlungrualna kan duh avangin min beitute pawh tumah kan beilet ngai lo. Zofate zingah inpumkhatna a awm thei dawn tak tak a nih chuan kan nihna te thiah vek a, a bul atanga tan that leh pawh kan duh a ni,” a ti bawk.