Japan-a hnathawk tura tawng zir turte vailiam

Mizo thalai zinga Japan rama hnathawk tura Delhi-a tawng zir turte chu nimin khan Aizawl atangin vailiam an ni.

Heng Mizo thalai thlahna hun LESDE Department Auditorium-a neih hi LESDE Department Director Angela Zothanpuii chuan hmanpuiin NSDC te hmalakna thlawp chungin Department in thalai te hmakhua ngai tak leh fimkhur tak chungin hmalakna kalpui zel a nih thin thu a sawi a. Japan SSW chu sawrkar hmalakna a Ministry of Skill Development and Entrepreneurship hnuaia kalpui a ni tih sawiin, kal tur zawng zawng te ngaihhruina thilpek a hlan bawk.

He hunah hian State Engagement Coordinator Ellen Lalnunmawii chuan Japan SSW program sawi zauin, LESDE Department hmalakna hnuaia Japan rama Caregivers hna thawk mek Mizo thalai mi 16 an awm thu leh kal tur a training nei mek leh nghak mek mi 14 awmin, tunah hian Mizoram thalai 30 ten training an tan leh dawn tih a sawi a ni.

Nimin-a thlah tak Mizo thalai mi 23 te hian Delhi-ah thla 9 chhung Japanese Language Training an nei ang a, chumi zawh chuan Japan lama employer thawhpui te kaltlangin an lehkha pawimawhte tihfel a nih hnuah Japan-ah hna an thawk thei dawn a ni.