Mizoram-a let duh lo Bru chhungkaw 6,959-te Mizoram E-Roll-ah paihin Tripura-ah inbengbel mek

Mizoram-a let duh lova Tripura-a inbenbel thlang Bru chhungkua 6,959-te chu Mizoram Electoral Roll atangin paih fel an ni tawh a, heng Bru-te hi Tripura District pali chhunga khaw 13-ah an inbengbel mek a, an zinga zatve awrh chauh an inbenbelna hi tihfel sak an la ni.

Mizoram Bru Displaced Peoples’ Forum (MBDPF)-a an hruaitu ni thin, Bruno Msha sawi danin, Tripura-a inbenbel thlang Bru-te hi Tripura sawrkar kaltlanga sawrkar laipui hmalaknain khaw hrang hrangah an awm mek a, hetihlai hian an inbenbelna tura hmalakna a chak tawk loh avangin harsatna hrang hrang erawh an tawk thung a ni. Bruno Msha sawi danin Tripura-a inbengbel mek Bru chhungkua zaa 60 bawr vel chauh chinfel an la ni a, a bak zawngte chuan an inbenbelna tura Tripura leh sawrkar laipui hmalakna an la ngaichang a. “Kan inbenbelna tur khaw hrang hrangah khaw dinna tura pawimawh - Link Road, Tui, School, Bazar hmun tur, Community Hall leh a dangte tihfel loh a la ni a, hmalakna a kal mek nain, duh ai chuan a muang,” a ti.

Bru-te hi Tripura-a District pali chhunga khaw 13-ah awmtir an ni dawn a, an vaiin chhungkaw 6,959 an ni a. Hetihlai hian Official-a hriat si loh, an chhungte bela Mizorama let leh thenkhat erawh an awm rin a nih thu Msha chuan a sawi bawk a. Tripura-a inbengbel Bru-te chu Tripura Electoral Roll-ah thunfel an ni vek tawh a, Mizoram Electoral Roll atangin paih vek an ni tawh bawk niin Bruno Msha chuan a sawi.

January 16, 2020 khan Ministry of Home Affairs, Mizoram sawrkar, Tripura sawrkar leh Bru hruaituten Mizorama kir duh lo Bru-te Tripura-a inbengbel turin inremna (agreement) New Delhi-ah an lo ziak tawh a, chumi ang chuan Mizorama let duh lo Bru-te chu Tripura-a inbengbel turin hmalak a ni a. May 21, 2010 atangin Bru-te Mizoram-a lak let hna tan a ni a, kum 2010-a agreement ziah thlengin Bru hruaikir hna vawi kua thawh a ni.

Tarlan tawh thin angin October 21, 1997-ah Persang khaw bulah Lalzawmliana, Forest Dept. Wildlife Game Watcher chu kahhlum a nih avangin Bru engemaw zatin Mizoram an chhuahsan a. Hemi hnu November 13, 2009-ah Bru Revolutionary Army nia inchhalten Bungthuam tlangval Zarzokima, an thah avangin Bru engemaw zat Tripura-ah an lut leh bawk a. Mizoram chhuahsan tlanchhia Bru-te hi Tripura-a Refugee Camp hrang hrangah awmtir niin sawrkar in Mizoram-a hruaikir tumin nasa takin hma a la a, Mizorama hruaikir hna vawi kua thawh niin, a hnuhnung ber chu October 3, 2019 atanga November 30, 2019 chhung neih a ni a. Hemi hnu hian sawrkar chuan Mizoram-a kir duh lo te chu Tripura-a inbengbel turin ruahmanna a siam ta a ni.