Serchhip District Wrestler te thlahna hun hmang

Inter-District Wrestling Championship vawi 7-na chu Vawiin hian LPS Arena, Falkland, Ai-zawl-ah neih a ni dawn a, Serchhip District aiawh turte chuan nimin khan Aizawl an pan a ni.
Inter-District Wrestling Championship 2024-a tel tur Serchhip District Wrestler te hi nimin zing khan an President K. Tlangthanmawia hovin Serchhip Bazar atangin thlahliam an ni a, Serchhip District aiawh tur hian Wrestler Mipa 31 leh Hmeichhia 4, an vaiin mi 35 an kal a, Match Official tur leh Coach mi pahnih ve ve bakah Manager pakhat, an vaiin mi 40 an kal a, Wrestler te hi Serchhip atangin mi 11 kalin East Lungdar leh Thenzawl atangin mi 12 ve ve an kal a ni.

Serchhip District Wrestler te thlahna hunah hian Serchhip District Wrestling Association President, K. Tlangthanmawia hian tun tum Inter-District Wrestling Championship-ah hian an Vice President boralta, C. Laldimpuia pualin inelna an hmachhawn dawn tih sawiin, Wrestler te pawh theihtawp chhuah turin a chah a. He intihsiakna atan hian Bialtu MLA leh Chief Minister Lalduhoma chuan Rs. 30,000 pein Hrangturzo Bialtu MLA Lalmuanpuia Punte chuan Rs. 15,000 leh District Sports Committee in Rs. 10,000 an pe tih sawiin, lawmthu a sawi bawk.

Tun tuma 7th Inter-District Wrestling Championship-ah hian Category pathum-ah thenin Weight Category 44-ah inelna neih tura ruahman a ni a, kum 15 hnuailam, Sub-Junior-ah Mipa tan Weight Category 8 leh Hmeichhe tan 7-ah inelna hi neih a ni anga. Kum 18 hnualam, Junior-ah Mipa tan Weight Category 7 leh Hmeichhe tan 6-ah inelna neih a ni anga. Senior-ah Mipa tan Weight Category 9 leh Hmeichhia tan 7-ah inelna hi neih a ni dawn a. Hei bakah hian Mizo Inchai-ah Mizoram Champion lai te cho thei tur zawnna neih nghal a ni dawn bawk a, Nulian, Nulaihawl, Nute leh Palian, Palaihawl leh Pate-a Champion te cho thei tur hi zawn nghal a ni dawn a ni.