Mizoram-a Skill Training kalpui chungchang sawipui

Labour, Employment, Skill Development and Entrepreneurship (LESDE) Department changtu Minister Lalnghinglova Hmar chuan nimin khan National Skill Development Corporation-International (NSDCI) hotute kawmin Mizoram thalaite tan Mizoram ngeia Skill Training lian tham kalpui dan tur an sawiho.

New Delhi-a Mizoram House Chanakyapuri-a an inkawmna ah hian NSDCI Advisor Dr. Dnyaneshwar Mulay leh Head of International Business Sudhanshu Aggarwal te telin LESDE Minister Lalnghinglova Hmar chuan Central Sawrkar hnuaia Skill Training Project-ah Mizoram nena inmil zawk leh Mizo thalaite thiam zawng Job Role neih a pawi-mawh thu a hrilh a. Mizoram thalaite tan kut themthiam zirna, Skill Centre lian tham din tura hmalak dan turte an sawiho a ni.

He hunah hian kut themthiam training bakah, training chhuakte support zui chungchang sawiho a ni a. A bikin rampawna hna hmute chu an kal dan leh thawhzui dan chungchangah dan ang thlapa kalpui a pawimawh thu tarlan a ni. A hma thei angin NSDCI aiawhte’n Mizoram tlawh a, Aizawl-ah Meeting neih leh thuai nise tih a ni.

Sports Minister ni bawk Lalnghinglova Hmar hian nimin vêk khan Ministry of Finance, Department of Economic Affairs hotute kawmin, Asian Development Bank hnuaia Mizoram Sawrkar Sports Project tang thenkhatte a sawipui bawk a ni.