Vaivakawn - Zohnuai a harsatna thleng enfiah

Aizawl Vaivakawn - Zohnuai kawng-a lei tlahniam leh a bulhnai a In chim mai thei dinhmun a awm te chu nimin zing khan DM&R changtu Home Minister K. Sapdanga leh Minister dangte bakah sawrkar Official ten a hmunah an enfiah.

Nimin zing-a helai hmun enfiahn ah hian DM&R Minister bakah PWD changtu Minister Vanlalhlana; PHE Minister Prof. Lalnilawma leh Deputy Govt. Chief Whip W. Chhuanawma bakah DM&R Director, Aizawl DC aiawh leh PHE, PWD, AMC, SIPMUI leh khawtlang hruaitute an tel a. DM&R Minister chuan Fur ruahtui tam avanga Vaivakawn - Zohnuai kawng a lei tlahniam leh leimin avanga harsatna hrang hrang thleng chu pawi a tih thu sawiin, Sawrkar department hnuaia mithiamte enpuina hnuaiah ruahmanna siam thuai a tul thu a sawi a. Hemi kawng a hma la tur leh ruahmanna bawhzui tur hian Deputy Commissioner Office, Aizawl ruat nise tih a nih thu a sawi bawk.

PWD Minister Vanlalhlana chuan khawtlang ah harsatna lian zawk a thlen loh nan In chim mai thei dinhmun a dingte chu a rang lamin a thiah hna kalpui a tul thu a sawi a. PHE Minister Lalnilawma chuan khawtlang a harsatna thlengte ngaihven leh chhawmdawl tura Sawrkar leh khawtlang hruaitute inpek thinna chu thlamuan thlak a tih thu a sawi bawk.

Helai hmun tlawha kal Minister te, Department hrang hranga thawktute leh khawtlang hruaitute hikawmin Vaivakawn - Zohnuai kawng lei tlahniam zel tur ven nan tui kawng siam that a tul thu te, lei tlahniam zawn chho a In chim thei awm te thiah a tul thu te, motor lian leh load phur lirthei tlan khap rih a tul thu te sawi a ni a. Lei tlahniam avanga tui connection khaihlak te tan 'Temporary connection point' siam tura hmalak a nih thu tarlan a ni bawk.