UNNATI 2024 tlangzarh a ni

India hmarchhak State ah Industry hmanga economy hmasawnna chak zawk a thlen theih nana hmalakna, Uttar Poorva Transformative Industrialization Scheme (UNNATI) 2024 chu nimin khan Mizoram tan Commerce & Industries Minister F. Rodingliana chuan a tlangzarh.

UNNATI 2024 tlangzarhna hun McCabe Hall, Aijal Club-a neih a nih rual hian hemi chungchang zirhona hi neih nghal a ni a, he hunah hian Minister F. Rodingliana chuan sawrkar laipui Scheme tha tak tlangzarh a ni chu lawmawm a tih thu sawiin, State sawrkar in Handholding Policy a kalpui mek leh tunhnai lawka Strategic Investment Plan hnuaia MSME Elevate Mizoram (MEMiz) Scheme a siam leh hmalakna dangte nen a remchan dan ang zela inzarzawm in, Industry neitute tan hmasawnna tha tak a thlen a beisei thu a sawi bawk.

Minister chuan tunhma lamah Mizoram a Industry neitute zingah an eizawnna bultan leh tihhmasawnna tur Loan an puk te chu a nihna tur a hmang lo te, rul thalo te an lo awm thin thu leh chu chuan Industry thanna tur a tihthuanawp thu a sawi a. Tunhnuah chuan hmasawn a hlawhtling tak tak duhte tan sawrkar chuan theihtawp a chhuah tur thu sawiin, Handholding Policy hmanga industry tihhmasawn a nih dan tur te a sawifiah a ni. Nimin-a he hun hman ah hian Dr. Karampaul Singh, Nodal Officer for NER chuan he Scheme thar chungchang hi a sawifiah bawk a ni.