Serchhip District-a VC 2 tiamin Sept. 24, 2024-ah VC hrang hrang 14-ah by-election neih a ni dawn

Mizoram State Election Commission chuan Mizoram District 8-a Village Council 14-ah September 24, 2024 khian by-election neih a ni dawn tih a puang a, heng VC zingah hian Serchhip District chhunga Village Council pahnih te pawh a tel a ni.

Nimin-a Mizoram State Election Commission in thuchhuah siama a tarlan danin Sub-rule (1) of Rule 3 leh Rule 37 of the Mizoram (Election to Village Councils) Rules, 2014 leh Section 3 of the Lushai Hills District (Village Council) Acts, 1953(as amended) in inthlan buatsaih tur a thuneihna a pek ang in State Election Commission, Mizoram chuan heng VC hrang hranga by-election neih tur thu hi tarlangin, heng VC by-election neihna turah te hian Vawiin hian inthlan hriattirna tihchhuah a ni anga, September 3, 2024 tlai dar 3:00 thlengin inthlan chuh tumte tan Nomination Paper thehluh theih a ni anga, heng te hi a tuk Sept. 4-ah enfiahin Sept. 6, 2024 tlai dar 3:00 thlengin inhnukdawk duh te tan hun hawn leh a ni ang. Inthlanna hi September 24, 2024-ah neiin zing dar 7:00 atanga tlai dar 5:00 thlenga Vote thlakin Vote thlak zawhfel a nih veleh Vote tla te hi chhiar nghal tur a ni anga. Engemaw avanga Vote thlak that ngai a awm a nih chuan Sept. 25, 2024-ah Vote thlak that tur a ni ang.

State Election Commission thuchhuah in a tarlan danin VC By-election neihna turte hi District 8-a VC 14-ah niin heng zinga VC pahnih te chu VC pum-a thlan that tur a ni dawn a, inthlanna neihna tur hi a vaiin General Seat 19 leh Reserved Seat 3 niin inthlanna neihna tur dang te hi VC Member dinglai an boral vang leh VC nilai an ban avang te a ni a. Serchhip District atangin Serchhip Chhim Veng leh New Serchhip North Village Council-a General Seat pakhat ve ve ah by-election hi neih a ni dawn bawk a ni.

Heng Vilage Council hrang hranga by-election neih tur atan hian kumin July 1a1 kum 18 tling chin te lain Electoral Roll ennawn hna chu thawh a lo ni tawh a, Deputy Commissioner chu District Election Officer (DEO) atana ruat niin anmahni puitu atan Addl. Deputy Commissioner-te chu Asst. District Election Officer (ADEO) atan ruat an ni bawk a. Inthlanna buaipuitu atan Returning Officer, Presiding Officer leh Polling Officer-te ruat an ni bawk.

Inthlanna neih tur puan a nih rual hian heng VC hrang hrangah hian Model Code of Conduct chu lekkawh nghal a ni a, tun tum By-Election-a Village Council member thlan thar Term chhung hi General Election to Village Council, 2020 term tawp rualin a tawp ang. SEC chuan inthlanna muanawm neih a nih theih nan mitin tawiawmna a ngen bawk a ni.