Khuarel chhiatna thlenga thi mi 42 tling tawh

Kumin January ni 1 leh August ni 12 inkar chhung khan khuarel chhiatna avangin Mizoram-ah mi 42-in nunna an chan.

Assembly Session neih zawh taka ziaka zawhna chhangin Disaster Management and Rehabilitation Minister K. Sapdanga chuan nunna chan chhungte hi State Disaster Response Fund (SDRF)-in ralna pek dan tur ruahmanna a siam angin cheng nuai 4 theuhin sawrkarin a ral niin a sawi a. Nunna chan hi Aizawl-ah District-ah tam berin mi 39 an ni a, Mamit District-ah pahnih leh Lawngtlai District-ah pakhat an thi bawk a ni. May ni 27 leh 28 a Cyclone Remal-in Mizoram a nuai chhung ringawt khan mi 34-in nunna an chan phah a, Cyclone Remal bakah kumin Fur chhung hian ruah a tam bakah a hma atangin nasa taka rial a tlak avang leh To thli leh thlipui tleh avangin chhiatna a thleng tam a. Nunna chan bakah in sang tam tak chu rial tla, thlipui leh ruahpui vanawn avanga leiminin a hnawl a ni.

Hetihlai hian Finance Department atanga thudawn danin kum 2023-2024 tangka kum chhung atana Finance Commission 15-na in SDRF hnuaia Mizoram tana sum a rawn pek tura ruahman cheng vbc. 41.60 a rawn pe tawh a, Mizoram sawrkar pawhin a tum ve tur cheng vbc. 4.80 chu a pe tawh bawk a, a vaiin cheng vbc. 46.40 a ni, an ti a. He sum hi hman a la ni lo niin an sawi bawk.