Revenue Department in In hmun lo ram teh tur Private firm-te agreement a siam pui

Mizoram sawrkar chuan Land Survey Firm 16-te Empanelment siamin heng Empanelled Survey firm-te hian a taka hna thawk thei turin nimin khan sawrkar aiawhte nen 'Deed of Agreement' an siam a, mipuiten awlsam zawka ram Survey leh Demarcation an kalpui theih nan hna an thawk dawn a ni.

Mizoram sawrkar in hmalakna thar a kalpui mekah nimin khan Land Revenue & Settlement Department changtu Minister B. Lalchhanzova chuan a Pisa-ah Land Survey leh Demarcation chungchanga Department-a Technical Officers leh Staff te indaih lohna avanga Mizoram mipuite harsatna tawhte sutkianna turin Empanelled Land Survey Firm Official-te a kokhawm a. He hunah hian Sawrkar aiawhin LR&S Department changtu Secretary Dr. H. Lalthlangliana leh Land Survey Firm Official ten 'Deed of Agreement' ah hming an ziak (signed) a. Sawrkar chuan Land Survey Firm 16-te Empanelment siamin heng empanelled Survey firm-te hian a taka hna thawk thei turin 'Deed of Agreement' hi an siam a ni.

He hunah hian Land Revenue & Settlement Department changtu Minister B. Lalchhanzova chuan Mizoram-ah danglamna (change) a awm theih nan te, ram mamawh leh ram kaihhnawiha harsatna tam tak chinfel a nih theih nan te, sawrkara hnathawktu Surveyor indaih lohna avanga mipuite harsatna tawhte sutkian zel tum a nih thu sawiin, Survey Firm-te hnenah duhsakna a hlan a. Sawrkar mit tlung taka an hna thawk tur leh Land Survey kalpui tur te, mipuite harsatna hrethiam a, zaidam leh hawihhawm taka dan hnuaia hna thawk turin a chah nghal bawk a ni.

Land Survey Firm-te hi Orientation Training pek an ni ang a; Orientation Training paltlangte hnenah Danin a tuk angin Land Survey Licence pek an ni ang. He inremna thuthlung-ah hian Sawrkara Land Revenue & Settlement Department hriatpuina leh phalna hnuaiah Land Survey Firm leh mipuiten awlsam zawka ram Survey leh Demarcation an kalpui theihna turte ruahman a ni.