Zirlai Hmeichhia te Karate zirtirna tur hawnna neih a ni

Serchhip District chhunga sawrkar enkawl Middle School, High School leh Higher Secondary School-a zirlai hmeichhia te tana mahni inven dan zirna tur, Girls Self-Defence Training chu nimin khan a hawnna hun hman a ni.
Samagra Shiksha hnuaia kalpui tur Girls Self-Defence Training (Rani Laxmi Bai Atma Raksha Prashikshan) hawnna hun hi nimin chawhnu dar 3:00 khan Govt. JM H/S Serchhip-ah neih niin he School Headmaster Paul Zohmingthanga chuan a hawng a, he hun ah hian All Mizoram Karate Association (AM-KA) Serchhip District President H. Sanghming-liana bakah AMKA General Hqrs. Aizawl atanga lo kal ten thu an sawi bawk a ni.

He Training hawnna hun hi Serchhip District-a Samagra Shiksha Dy. DPC PC. Van-lalluna chuan kaihruaiin Asst. Programme Officer (APO) C. Lalremruata chuan he ruahmanna an kalpui dan tur hi a sawi a. He ruahmanna ah hian Serchhip District chhunga Middle School 53-a Zirlai hmeichhia te bakah High School 21 leh Higher Secondary School 3-a Zirlai hmeichhia te chu mahni invenna atan Karate zirtir an ni dawn a, heng zirlai hmeichhia te hi AMKA atangin Instructor mi 12 ten an zirlai tibuai lo thei turin zing ah emaw, tlai-ah emaw Karate hi an zirtir dawn a, karleh atangin he Training hi neih tan tur a ni ang. Nimin-a he hun hmanna ah hian AMKA General Hqrs. atangin Lalramthara, General Secretary leh Lalropuia, Secretary te an rawn kal a ni.