Aizawl City Centre hna thawh mek MSPMC in enfiah

Mizoram State Project Monitoring Committee Team ‘B’ leh ‘C’ te chuan Aizawl City Centre leh Aizawl City Centre Annexe, New Market, Aizawl sak hna thawh mek te chu niminpiah khan an enfiah.

Aizawl City Centre hi cheng vbc. 42.82 senga sak mek niin UD&PA Department hnuaia Aizawl Smart City Limited ten a sak hna hi enkawlin, Contractor ah Lushai Engineers, Aizawl te hman an ni a. He hna hi January, 2023 khan tan niin Nov. 30, 2025-a zawh tura ruahman a ni a. A hna hi za zela 38 vel zawh tawh a ni a. Mizoram State Project Monitoring Committee te hian hna kal lai hi uluk taka endik in, chak zawk leh tha zawka hna kalpui dan tur Nodal Department leh Contractor te an sawipui a. An harsatna tawh te pawh sutkian dan tur an sawiho bawk.

Aizawl City Centre Annexe hi NEDP sum cheng vbc. 36.41 senga sak mek niin Nodal Department chu Commerce & Industries Department an ni a, Lushai Engineers, Aizawl ten a sak hna hi thawkin he hna hi June 24, 2020-ah thawh tan a ni a, tunah hian hna hi za zela 75 vel zawh tawh a ni. Heng building pahnih te hi dawr leh thlai thar zawrhna hmunpui tur a ni. MSPMC Team te hian tun tum hi helai hmunah hnathawh tum hnih an enfiahna a ni.