KVK Serchhip District in Badam chin enchhinna an kalpui mek chu hlawhtling taka seng tan a ni
KVK Serchhip District hmalakna hnuaiah tunah hian khaw 6-ah Badam ching mi 70 vel awm mekin nimin khan 'PM 100 Days Programme on Diversification Programme on Oilseeds during Kharif 2024' pualin Badam sengna hun hi hman a ni a, he hun hi KVK Serchhip District-a Senior Scientist & Head Dr. T. Vanlalngurzauva chuan hmanpuiin Mizoram-in hriak lama tan kan lak kan mamawh thu leh intodelh thei kan nihna te, intodelh tura thlai chi (variety) thlan kawnga uluk a tul thu te sawiin, hriat duh an neih ang ang te inthlahrung lova zawt turin he huna tel Badam chingtute chu a fuih a, Loneitu ten an Badam thar te awlsam tak a hriak sawrchhuahna khawl, KVK a mi chu hman theih a nih tawh dawn thu a sawi bawk.
He hunah hian KVK-a Subject Matter Specialist (Agronomy) Kenny Zohmingliana chuan thlai hriak pai (Oilseed crops) ah intodelh theihna kawng zau tak a awm thu tarlangin, Badam chin chungchang zirtir a, tunah hian KVK Serhhip te hian Badam chi tha pahnih Visishta (TCGS 1694) leh TAG-73 an kalpui mek thu sawiin, Hectare khat-ah TCGS 1694 hian badam (pod yield) chu Fur laia chin in kg. 2489 leh Thlasik-a chin in kg. 2495 a thar theih thu leh a Oil Content hi 50% lai anih theih thu a sawi a. TAG-73 hian Badam natna te engemaw chen a do theih thu te, nipui laia chinin Badam kg. 2500-2800 thleng Hectare khat atang thar theih anih thu leh a hriak pai pawh 49% anih thu te sawiin, heng badam chi hnih te hi eizawnna tlak (commercial potential) nei tha anih thu a sawi bawk.
He program chhunzawm hian Badam thar hlawk dan hi Agriculture chhiarkawp hmang in hmun hrang hranga Badam tharchhuah te nen khaikhin a ni a, beisei dan chuan Tin 2 leh a chanve hmun atang hian kg. 1800 kg vel thar chhuak thei beisei a ni. India ramah hian 1700 kg/ha hi Badam tharchhuah theih dan (average productivity, 2021) a ni a, KVK Research & Demonstrational farm a Badam tharchhuah theih dan hian a khum a ni.
Comments
Post a Comment