The Mizoram (Village Councils) Bill 2024 sawiho

Mizoram-a Village Council kalpuina dan hman mek thlakna tur Bill, 'The Mizoram (Village Councils) Bill 2024' chungchanga inrawnkhawmna chu nimin khan a tum hnihna atan Aizawl-a Secretariat Conference Hall-ah neih a ni.

He inrawnkhawmna hun hi LAD Minister C. Lalsawivunga chuan kaihruaiin LAD changtu Secretary Teresy Vanlalhruaii chuan 'The Mizoram (Village Councils) Bill 2024' chungchang a sawizau a. LAD Minister C. Lalsawivunga chuan thingtlang lam khuate tihhmasawnna tur te, mahni inrelbawl thei tur a thuneihna pek te leh khawtlang tana hamthatna hrang hrang awmte chak zawk a kalpui a nih theih nan ‘The Mizoram (Village Councils) Bill, 2024’ chu ruahman a nih thu a sawi a. Khawtlang tihhmawsawn nana inkaihhruaina tur a nih dawn avangin uluk tak a zirchian leh sawiho a pawimawh thu sawiin, Consultative Committee thutkhawm hmasa thurel bawhzui a chak taka hma latu,’Drafting Committee’ te inpekna chu lawmawm a tih thu a sawi bawk.

The Mizoram (Village Councils) Bill, 2024-ah hian Village Council din a nih theih dan te, Village Council member bituk zat te, Village Council hruaitu thlan dan te leh inthlanna chuh tura thil ngai hrang hrangte a awm a. Village Council thuneihna te leh hmasawnna hna thawh kawng a inkaihhruaina leh mawhphurhna te a chuang a ni. Nimin-a inrawnkhawmna ah hian LAD a thawktute, Drafting Committee member, Political party leh tlawmngai pawl aiawhtean tel a. He Bill hi uluk taka zir leh sawiho a ni.