AMVMSA Golden Jubilee lawmna Minister in hmanpui

All Mizo Veterinary Medical Students' Association (AMVMSA) chuan Inrinni kalta, August 24, 2024 khan an dinchamphaphak vawi 50-na, Golden Jubilee lawmin AH&Vety Minister C. Lalsawivunga chuan a hmanpui a ni.

College of Veterinary Sciences & Animal Husbandry (CVSc&A.H) Auditorium, Selesih-a he hun hman ah hian AH&Vety Minister chuan Veterinary Doctor zirlai intelkhawm AMVMSA in kum 50-na hmel a hmu chu a lawmpui thu sawiin, an thlen chinah duh tawk mai lova tun aia hmasawnna nasa zawk thlen thei tura theihtawp chhuaha lehkha zir turin a fuih a. AH & Vety Department hmasawnna tur leh zirlaite hmakhua ngaia hmalak a nih thu sawiin, Sawrkarin Vety Doctor 10 leh VFA 9 a la dawn a, mamawh dangte pawh ngaihtuah zui zel tum a ni, a ti a. Vawk hrileng ASF beihlet kawnga Department thawktute inpekna fakawm a tih thu sawiin, State pawn leh ram dang atanga vawk, vawksa leh vawksa atanga thil siamte lakluh khap mek a ni a, sawrkar laipuiah hripui leng avanga harsatna thleng chhawmdawlna tur project thehluh a nih thu leh theihtawp chhuaha umzui zel a nih thu a sawi bawk. 

AH & Vety Minister chuan dikna, taimakna, rinawmna leh thawhrimna nena hna thawk tura he huna kalkhawmte chu chahin, Project hluihlawn avanga sawrkarin sum leh pai leh tha tam tak a sengral thin chu pawi a tih thu a sawi a. Ban-a Kaih policy hnuaiah erawh Project chhawrnahawm, hlawhtling tura ngaihte leh a ti tak takte chauh puih tum a ni, a ti a. AH & Vety. Department hnuaia hmalaknate chu mipuite nitin ei leh bar innghahna a nih avangin khawtlang nun leh sum dinhmun chawikan kawnga theihtawp chhuahpuiah Veterinarian-te a sawm nghal bawk. 

He hunah hian khual zahawm AH&Vety Department Director Dr. C. Lalrintluanga chuan ASF hrileng laka hmalak kawngah Minister hovin theihtawp chhuah a nih thu leh Line Department dangte nen lungrual taka hmalak a nih thu sawiin, kumin January thla atanga August ni 23 thlengin Vawk 10739 an thih tawh thu leh hrikai 18978 te suat an nih tawh thu a sawi bawk.

All Mizo Veterinary Medical Students' Association (AMVMSA) hi October ni 25, 1974 khan din niin, thupui atan 'To Empower And Encourage Fellow Veterinarians' tih an hmang a, tun dinhmunah active member 118 nei mekin, heng zinga 83 te hi CVSc & A.H Selesih, Mizorama zirlaite niin, CVSc & A.H Khanapara, Assam-a zirlai 17 leh CVSc & A.H Jalukie, Nagaland-a zirlai 18 te an awm bawk a. Golden Jubilee lawmna hun hi AMVMSA Gen. Hqrs. Khanapara, Assam-a President C. Lalhlimpuia chuan kaihruaiin 'Socio-Economic Development through Animal Husbandry in Mizoram' tih chu thupui-ah hman a ni.