Governor in Lok Ayukta Judicial Member leh MPSC Member thar mi pakhat ve ve a lalut

Mizoram Governor Dr. Hari Babu Kambhampati chuan nimin khan Mizoram Lok Ayukta leh Mizoram Public Service Commission (MPSC) member ruat thar mi pakhat ve v te chu rinawmna thu tiam tirin a lalut.

Raj Bhavan Durbar Hall-a he hun hman ah hian Mizoram Lokayukta Judicial Member atan Joel Joseph Denga (MJS Retired) leh MPSC Member atan K. Lalhmingliana (MCS Retired) te chu rinawmna thu tiam tirin lakluh an ni a. He hun hi Chief Secretary Dr. Renu Sharma IAS chuan kaihruaiin heng mite ruat an nihna a chhiarchhuak a, hemi hnu hian Governor Dr. Hari Babu Kambhampati chuan Mizoram Lok Ayukta Judicial Member thar atan Joel Joseph Denga (MJS Rtd) leh MPSC Member thar atan K. Lalhmingliana (MCS Rtd) te chu rinawmna thu tiam tirin a lalut a ni.

Nimin-a he hun hman ah hian Chief Minister Lalduhoma bakah Speaker Lalbiakzama, Cabinet Minister te, Minister te, MLA te leh mi pawimawh dangte an tel a ni.

Lokayukta Judicial Member thar Joel Joseph Denga hi June 10, 1964 khan piangin a nu leh pa te chu C. Chaldenga (L) leh Mary Doris (L) te an ni a, tunah hian a nupui PC. Lalhmingliani leh a fate 3 nen Tanhril Veng-ah an cheng mek a ni. Thiamna lamah BA, LL.B degree neiin kum 1998 atang khan Advocate hna a thawk tan a, May 4, 2011 khan Mizoram Judicial Service (MJS)-ah lutin Law & Judicial Department hnuaiah hna pawimawh tak tak a thawk tawh a, February 26, 2014 khan Member Secretary, MLSA hna chelhin kum 2018 January thla khan District and Session Judge-ah kaisangin High Court-ah Registrar hna a lo chelh tawh bawk a, Lok Ayukta Judicial Member atana ruat a nih lai hian District and Session Judge, Aizawl hna a chelh mek a ni.

MPSC Member thar K.Lalhmingliana hi February 6, 1966-a piang niin a nu leh pa te chu Sub. Airuma (L) leh Lalhlimpuii Sailo (L) te an ni a, a nupui F. Lalhlupuii leh a fate 2 nen Sawrkar Quarter, MINECO-ah an cheng mek a ni. K.Lalhmingliana hian BSc (Hons) degree a nei a, April 1, 1998 khan Mizoram Civil Service (MCS) ah a lut a, MCS Junior Grade, Senior Grade leh JAG a nih laiin Mizoram hmun hrang hrang leh Department hrang hrangah nihna pawimawh tak tak chelhin a thawk kual tawh a. DM&R, LAD leh Fisheries-ah te Joint Secretary hna a thawk tawh a, LR&S leh LESDE-ah te Director hna a chelh leh hnuin Addl. Secretary hna FCS&CA,C&I leh LESDE-ah te a thawk leh a. MPSC Member thar atana ruat a nih lai hian Municipal Commissioner, AMC hna a chelh mek a ni.