Lunglei-ah Silencer/exhaust man tihchhiat a ni

Lunglei SP J. Lalmuankima kaihhruaiin Lunglei Traffic Police te chuan dan phal loh Two Wheeler Silencer/Exhaust an man te chu nimin khan an tichhia a, heng te hi ri rin zawng tehna a 80 decibel pel leh a ri ring tura siam danglam a ni.

Traffic Police te chuan Silencer leh Exhaust ri ring leh siam danglam 41 manin, dan bawhchhia te hi dan anga pawisa chawitir an ni a, an pawisa chawi tlingkhawm hi sawrkarah thehluh a ni. Nimin a he hun hmanna ah hian Lunglei SP J. Lalmuankima chuan dan in a phal loh silencer ri ring hmangtute hian mipui tan harsatna an thlen thin avangin lirthei neitute hnen atang hian dan ang thlapa man sak a nih hnuah Court thuchhuak angin tihchhiat a ni tih a sawi a, a hnuah thirchhia anga hralh lehin sawrkarah a hralhna sum thehluh tur a nih thu a sawi bawk.

Lunglei Traffic Police te chuan dan phal baka silencer/exhaust ring tak tak hmangtute an zawng chhun-zawm zel dawn tih sawiin, khawpui chhunga an duty bakah NHIDCL in National Highway an siam zawh tawh chinah lirthei khalhtute leh zin mite an him zawk nan ngawrh lehzuala duty turin hma an la a. Hemi kawnga harsatna tawkte chuan Lunglei OC emaw, Traffic lam thawktute hnenah hriattir turin an ngen a ni.