Mizoram-a Skill Training Centre din leh Olympic 2036 chungchang sawrkar laipui-a mi pawimawh ah thlen

Mizoram sawrkar-a Minister Lalnghinglova Hmar chuan nimin khan NITI Aayog Member Dr. VK. Paul chu New Delhi-a NITI Aayog Headquarters-ah kawmin Mizoram thalaite tan Mizoram-a Skill Training Centre din chungchang leh Olympic 2036-a Mizo infiammi tam thei ang ber an tel theih nana hmalakho dan tur an sawidun.

Sports Department leh LESDE changtu Minister Lalnghinglova Hmar chuan NITI Aayog Member Dr. VK. Paul-a hnenah hian Olympic 2036-ah Mizoram atanga infiammi tam thei ang ber tel se an duh thu leh chumi atan kumin June 13 leh 14-ah ‘Mizoram Sports Conclave’ buatsaih a nih tawh thute sawiin, Mizoram chuan ‘National Games 2032’ thlen ngei a duh tih a sawi a, Sports chu intihhlimna mai ni lo, taksa leh rilru hriselna atana pawimawh tak leh khawvel hmuha India pholang theitu a nih thu a sawi a ni. LESDE Minister ni bawk Lalnghinglova Hmar chuan Mizoram-a Skill Training Centre lian a awm loh avangin Mizo thalaite’n harsatna an tawh thin thu pawh thlenin, Central Sawrkar hnuaia Skill Development Project-ah Mizoram nena inmil leh Mizo thalaite thiam zawng Job Role siam a pawimawh thu a sawi bawk a ni.

NITI Aayog Member Dr. VK Paul chuan Minister thu thlente chu mimal tak pawha a ngaih pawimawh hlawm thu a sawi a. Ziaka rawtna (proposal) chiang zawk nen, State Sawrkar leh NITI Aayog te’n presentation siama September thla chawhma lamah meeting neih leh nise an ti a. Minister-in a sawm angin October thla chhung ngeia Mizorama lo zin a tum thu a sawi bawk.

NITI Aayog-a Adviser for Northeast Yugal Joshi pawh Lalnghinglova Hmar hian kawmin Olympic 2036 inbuatsaihna pakhatah, Public-Private Partnership (PPP) Mode-in Sports discipline hrang hrangah Coaching kalpui tum a nih thu leh Mizorama khua zawng zawng telh tum a nih thu a sawi a. Minority Affairs changtu Minister Kiren Rijiju pawh hmuin Minority Affairs Ministry hnuaia project hrang hrangah Sports hmasawnna ruhrel telh ve ngei a pawimawh thu a thlen bawk a ni.