Lawngtlai leh Hnahthial-ah Bank te hmalakna thlirho

Lawngtlai District chhunga Bank hrang hrang te hmalakna thlirin Lawngtlai District Consultative Committee (DCC), District Level Review Committee (DLRC) leh District Level Security Committee (DLSC) chu nimin khan an thukhawm a, he thutkhawm ah hian June thla tawp Quarter thlenga Bank hrang hrangte hmalakna leh an dinhmun te thlirho a ni.

He hunah hian Financial Inclusion Plan (FIP) hnuaiah Lawngtlai District chhunga mihring 2,000 chunglam chenna khaw tinah mipuiin Bank kaltlanga hamthatna hrang hrang an chhawr ve theih nan an khuaah Bank Branch emaw, Business Correspondent emaw, Indian Postal Payment Bank emaw dah tura hmalakna kalpui mek a nih thu leh tun dinhmunah Lawngtlai District chhungah Bank Branch 12, ATM Booth 6, Business Correspondent 36 leh Financial Literacy Centre 1 a awm mek thu tarlan a ni a. Hei bakah hian Lawngtlai District-a Bank-te chuan June 2024-ah CD Ratio 116.93% an nei tih tarlan niin, March, 2024 (121.38%) nen khaikhinin CD Ratio hi 4.46%-in a a tlahniam a ni.

Hnahthial-ah pawh nimin khan an District chhunga Bank hrang hrangte hmalakna te thlirin thutkhawm neih a ni a, he hunah hian Bank a mipuiin sum an dah luh (Deposit) zat za zela Bank in mipuia sum an puktir (Credit) zat chhutna, CD Ratio-ah quarter hmasa a 60.73% chu tun quarter ah 62.93% a kai thu tarlan niin RBI in a bituk zat za zela 60 an kai ta chu thil lawmawm tak a nih thu tarlan a ni a. Hnahthial District a Bank awm pathum- SBI, MRB leh MCAB ten KCC Loan an pek dan te, MzSRLM hnuaia Self Help Group loan an pekchhuah te, PMEGP leh NULM hnuaia loan an pekchhuahte thlirho bawk niin Line Department te leh Bank te chu thawhhona tha zawk nen mipui harsatna sutkian a nih theih dan tur ngaihtuah hovin ruahmanna leh rawtna ngaihthlak ho nghal a ni bawk.