North Vanlaiphai khua tihmingthatute chawimawi

Kawng hrang hranga North Vanlaiphai khua tihmingthatute chawimawina hun chu nimin khan North Vanlaiphai SDO (Civil) Dr. Peter Malsawmtluanga kaihhruaina in neih a ni.

Serchhip District chhunga awm North Vanlaiphai khua kawng hrang hranga tihmingthatu National Awardee/Gold Medalist te lawmpuina leh chawimawina hun hi kumin August 15-a India Independence Day lawmna ah khan neih tura ruahman a ni a, North Vanlaiphai-a tlawmngai pawl hrang hrang ten India Independence Day lawmna an boycott avanga mipui huapa hun hman theih a nih tak loh avangin nimin khan North Vanlaiphai Village Council Member, Area MUP, Jt. MHIP, Jt. YMA hruaitu leh Chanchinbu mi te chuan SDO (Civil) Office-ah an hmang ta zawk a ni.

Nimin-a chawimawina dawngtute hi National Billionaire Farmer of India 2023 Awardee Lalthanthuami (Kimkim Food Processing); National Millionaire Farmer of India 2023 Awardee Vanlalfela (MF Sunhlu); National Award to Teachers 2021 Awardee Jacinta Vanlalengzami; Sub-Junior Boys National Boxing Championship 2024-a Gold Medalist Justin M. Lalthanpuia leh REC Combined National Talent Hunt Prog-ramme 2023-2024 (Boxing)-a Gold Medalist TC. Malsawmkimi te an ni a, heng mite hnenah hian chawimawina thuziak hlan theuh an ni.

Nimin-a he hun kaihruaitu North Vanlaiphai SDO (Civil) Dr. Peter Malsawmtluanga chuan chawimawina dawngtute chu a lawmpui thu sawiin, a kal zelna turah duhsakna a hlan a, heng chawimawina dawngtute chanchin tlangpui he hunah hian tarlana ngaihthlak a ni bawk.