MPCC in Unified Pension Scheme a rang thei ang bera kalpui ve turin Mizoram sawrkar an phut

Mizoram Pradesh Congress Committee (MPCC) chuan Mizoram sawrkar in Unified Pension Scheme (UPS) chu sawrkar hnathawk te tan arang thei ang bera an kalpui ve ngei an beiseiin an phut tih an sawi.

Nimin a thuchhuah an siamah MPCC chuan NDA sawrkar chuan New Pension Scheme chu thiatin Congress in Manifesto-a an lo neih Old Pension Scheme nena in ang tak, 'Unified Pension Scheme' (UPS) chu hman turin an siam thar tih an sawi a, UPS hi Union Cabinet chuan August 24, 2024 khan pawmin, Inflation trend milin Dearness Relief tihsan thin a ni ang a, sawrkar hnathawk an boralin a chhung ten Family Pension 60% la thei dawnin Retirement dawnah Gratuity Benefits Lumpsum Superanuation Payout a la thei dawn bawk tih an sawi a. Hei mai bakah hian Central sawrkar hnuai hnathawk kum 10 chuang Service tawh te chuan a tlem berah pension tlatin Rs. 10,000 an la dawn bawk tih an sawi a ni.

Tuna UPS Union Cabinet in a pawm tak hi April 1, 2025 atangin State tena an duh a nih chuan an hman tan theih tur thu leh OPS leh UPS danglamna ber chu OPS chu Liabilities niin Employees emaw, Employer ten emaw contribution an neih a ngai lova, UPS-ah erawh contributory Scheme ni dawnin sawrkar hnathawk te chuan an hlawh atangin 10% pe in sawrkar in 18.5% a tum thung dawn tih an sawi a ni.

MPCC thuchhuah chuan Mizoram sawrkar chuan Pension Scheme hi engtin nge a kalpui dawn an la sawi lo tih tarlangin, “He Pension Scheme thar hi sawrkar hnathawk te tan arang thei ang bera an kalpui ve ngei kan beiseiin kan phut a ni,” an ti.

Sawrkar laipui hnuaia hnathawkte pension scheme thar, Unified Pension Scheme (UPS) hi sawrkar hnathawk nuai 23 velin an hlawkpui tur niin thil dang bakah sawrkar hnathawk pension tawhte leh an chhungte hamthatna tur engemawzat a tel a, pensioner chuan a thih hmain a pension pawisa zaa 60 a chhung-ten an la thei dawn bawk a ni.