Kolasib District-ah kawngpui hrang hrang dangchat

Kolasib District-a lirthei neitu leh Driver pawl hrang hrang panga te chuan nimin August 22, 2024 chawhma dar 10:00 atang khan Vairengte - Sairang leh Bairabi - Kolasib inkar Kawngpui (National Highway) chu an dangchat a, boruak duhawmlo thleng a awm hriat a ni lo.

Kolasib District Truck Owner’s Association (KDTOA) leh Kolasib Joint Action Committee (JAC) Co-ordination Committee te hian Kolasib District chhunga kawngpui pawimawh a chhiat avanga kawngpui tha an neih thuai theihna atan leh Zoram mipuite harsatna sutkian thuai anih beiseina avangin NH-54/306/06 kawngpui te lirthei eng chi mah tlan lo turin an ngen a, Kawngpui dan pin a nih avanga mipuiten harsatna an tawh loh nan sumdawngtuten an thil zawrh te a man bithliah pangngai aia to in tuman hralh lo turin an ngen bawk a ni.

Kawngpui dan huaihawttute hi Vairengte, Saiphai, Rengtekawn (Bairabi kawng peng), Bualpui North-ah leh Kawnpui Serkhan pengah te an duty a. Kawngpui dan huamchhunga khaw hrang hrangah erawh chuan nunphung a pangngai a, Zirna In, Sawrkar pisa, Bank, Damdawi In leh Bazaar te pawh hawn theih a ni.

Kawngpui dan chah chungchangah hian nimin chawhma dar 11:00 khan Kolasib DC Robert C. Lalhmangaiha chuan a pisa ah Kolasib District MJA hruaitute kawmin an hmalakna hrang hrang a hrilhfiah a. Kolasib DC chuan Sethawn (RTP Farm bul) leh Kawnpui Quarry bula kawng chhe zual lai siamthat anih theih nana hma an lak dan te sawiin, kawngpui chhe zual lai hi ni 15 chhunga siam tha vek turin NHIDCL hotute leh Contractor te hriattir an nih tawh thu a sawi a, an hmalakna ngai changa an beisei anga an siamtha lo anih chuan tun aia na in Contractor leh NHIDCL hotute nawr leh anih tur thu a sawi a. Hetianga hmalak anih avang hian Road Block huaihawttute chu an thil kalpui mek chu mipuite hmakhua ngaihna avangin titawp se a duh thu a sawi a ni.

Kolasib District Bawrhsap chuan, Kawngpui chhe zual lai siam dan thli thlai a, a tul anga a hmuna endik leh viltu tur Working Group din anih tawh thu leh Kolasib SDO (Sadar) H. Lalramliana kaihhruaina hnuaiah din anih thu a sawi a. Tun dinhmunah kawngpui chhe zual lai thawm that chu an ngaih pawimawh ber anih thu a sawi bawk.

He thutkhawm zawh hnu hian DC leh MJA hruaitute chuan Road Block duty-na hmun thenkhat an tlawh nghal a, Road Block avang hian thil duhawmlo a thlen thu hriat ani lova, lirthei khalhtu leh mipuite pawhin an thlawp tha rih hle ni a hriat a ni a. Kolasib Bialtu MLA leh Assembly Deputy Speaker Lalfamkima chuan nizan khan kawngpui dangtute hi a chenna In ah kawm a tum bawk a ni.