State dang te hmasawnna kan hmuh ang kan kawtkai a awm turin a ngaihna kan hre lo niin sawi

BJP Mizoram President Vanlalhmuaka chuan State dang hmasawnna kan hmuh te chu kan kawtkaia awm tur chuan a ngaihna kan hre lo niin a sawi.

BJP Mizoram ten Karthar Inhlanna leh Political Session nimin-a Aizawl-a an Office-a an buatsaih ah BJP President Vanlalhmuaka chuan Lengpui Airport siamna tur sum pek a nih hnuah hmasawnna erawh a kal muang hle nia sawiin, “Four Lane kawngpui pawh hi Central hmalakna a ni a, sum pawh awm sa a ni. Nimahsela Vawiin thlenga kawng tha kan neih theih loh chhan chu State Sawrkar hian kawng siamna tur atan a tih tur a tihfel loh vang a ni thung a ni,” a ti a. “Sawrkar hian Ram hmasawnna aia ngaih pawimawh dang an nei thin a, Compensation buaiin kan buai luih luih a, Vawiin thlenga Vairengte leh Aizawl inkar kawng chhiat vangin kan buai phah ta a ni. Chuvangin Mipui hian thil tak tak kan ngaihtuah a ngai a ni,” a ti a. Aizawl khawpui tawt lutuk leh Traffic Jam nasa lutuk tih ziaawmna tur Aizawl By-Pass Road siamna tur pawh Central chuan cheng vbc. 500 min pe nia sawiin, “Nimahsela Vawiin thleng hian hnathawh theih a la nilo hi a buaithlak hle bawk a, Mizoram hian State dang hmasawnna kan hmuin kan thlir a, kan kawtkaia awm tur erawh chuan a ngaihna kan hre lovin, mimal anga hlawkna kan tel ve theih dawn loh chuan kan tikhawtlai duh thin ni pawhin a lang a ni,” a ti bawk.

BJP President chuan PM Schemes hrang hrangte Mipui te'n kan hman tangkai theihna turin National hruaitute nen thutkhawm an neih ah an sawi thu pawh sawiin, “A bikin MUDRA Loan te pawh Central-in Bank hrang hrangah Loan pe turin ruahmanna a siam a, hei pawh Eizawnna bul tan tur te tana tangkai taka hman theih a nih avangin a pawimawh hle a ni,” a ti a. State Sawrkar ngei pawhin an Policy nen kaihkawp tumin Hand Holding Policy ah kaihluh an tum nia alan thu leh a lawmawm rualin PM Schemes chu PM Schemes a nih anga tha taka lo thawhpui a, rem leh rem lova mahni Party hamthatna atana hman tum mai lo tur leh a chhawr tur dik tak te tana awlsamna kawng lo zawn pui se State sawrkar hmalakna ropui tak a nih tur thu a sawi bawk.