Zirna Huang atan Education Department leh DDK Aizawl ten thawhdunna an ziak leh

Doordarshan Kendra (DDK) Mizoram Channel-a Educational TV Programme, ‘Zirna Huang’ chhunzawm zel turin School Education Department leh Doordarshan Kendra Aizawl-te chuan nimin khan inremna an ziak.

He inremna ziah thar ah hian School Education Department aiawhin Director Lalsangliana leh Doordarshan Kendra Aizawl aiawhin Head of Programme C.Vanlalsiama te chuan an hming an ziak a, hemi puala School Education Directorate Committee Room-a hun hman ah School Education Director Lalsangliana chuan kum 2015-a bul tan Educational TV Programme chhunzawm zel a ni chu lawmawm a tih thu a sawi a. DD Mizoram chu thlirtu an tam a, khawpui chhung mai bakah thingtlang leh ram thenawm atangin an thlir thei a, a hlawkna teltu an tam thei hi a hlu hle a ni, a ti a. “Educational TV Programme neih hi a tangkai a, Ministry of Education pawhin 'Best practices' zingah a pawmsak a ni,” a ti a, Zirna lam thil pawimawh chi hrang hrang puan chhuahna programme a awm thei chu lawmawm a tih thu a sawi bawk.

He hunah hian DDK Head of Programme C.Vanlalsiama chuan School Education Department nen thawhdunna an ziak leh thei ta chu lawmawm a tih thu a sawi a. School Education Directorate te, SCERT, MBSE leh Samagra Shiksha te tha taka thawhhona programme a ni chu a lawmawm hle tih sawiin, Education Department te nena thawkho a programme an siam chu DD Mizoram tan pawh programme tangkai tak a nih thu leh thawhhona chu chhunzawm zel theih ni se a duh thu a sawi bawk.

Nimin-a he hun hman ah hian C. Chawngthantluanga, Secretary & Convener, Programme Advisory Committee chuan kum 2015 atanga thawhdunna neih tawh dan report pein Educational TV Programme chu School Education, SCERT, MBSE leh Samagra Shiksha te tangho a programme siam thin a nih thu a sawi a, kumina thawhhona ziah chu a vawi 8-na a nih thu te, kum khat chhungin Episode 52 tihchhuah tur a nih thu te, kum 2015 atanga August 2024 inkarah Episode 363 tihchhuah tawh a nih thu te a sawi a. September 2024 atangin kum khat chhungin chawlhkar tin Ningani apiangin tlai dar 5:55 leh 6:25 inkarah programme tihchhuah chhunzawm a ni dawn a, TV Programme hi Media Cell, School Education Department leh SCERT ten an siam leh dawn tih he hunah hian a sawi bawk a ni.

School Education Department leh DDK Aizawl ten Educational TV Programme tihchhuah chhunzawmna atana thawhdunna tur thuthlung an ziahnaah hian School Education Director Lalsangliana bakah SCERT Director Zohmingliani te, MBSE, Samagra leh DDK hotute te an tel a ni.