Serchhip-ah NH-54 kawng siam mek sawiho

Nimin khan Serchhip-ah District Bawrhsap Paul L. Khuma hovin NHIDCL in Serchhip District chhunga NH-54 siam hna an thawh mek chungchang sawiho a ni.

He sawihona Serchhip DC Meeting Room-a neih ah hian tun thla ni 24-a Keitum leh Bungtlang khuaa kawng siam la zawhfel lohna hmun hrang hrang DC in a tlawhchhuah tawh te siam zawhfel thuai a nih theih nan hmalak dan tur an lo sawi tawhte tarlan a ni a. An thawh tawh chin leh hmabak la awm te thlirho a ni a. Hei bakah hian Kawng laihna vungin Serchhip Mat phai-a loneitute harsatna a thlen chungchang sawi niin leilet tihchhiat bakah an tuilak kawng a tihchhiat chungchang thu hi NHIDCL leh an hnuaia thawk Contractor te hi sawipui an ni bawk. Heng bakah hian Geo reference co-ordinate chungchang pawh sawi niin hemi atana sum mamawh turte sawilan a nih bakah kawngpui siamin ram a tihchhiat sakte zangnadawmna la pek lohte pawh pe thuai tura tih an ni bawk. He thutkhawm ah hian Addl. DC Lalrinzuala, SDO (S) Rebecca Laldinmawii Hrahsel, Settlement Officer Gaston Vanlalhriatpuia leh NHIDCL hotute bakah an hnuaia thawk Contractor te an tel a ni.